ԵՐԵՎԱՆ, 30 հոկտեմբերի – Sputnik. ԱՄՆ նախագահ Դոնալդ Թրամփն ամփոփել է Չինաստանի նախագահ Սի Ծինփինի հետ իր բանակցությունները՝ այն անվանելով «շատ բարեկամական» և «վերջին ժամանակների լավագույններից մեկը»։ Նրա խոսքով` հանդիպումն անցել է կառուցողական մթնոլորտում և շոշափելի արդյունքներ է տվել։
«Կարծում եմ՝ զրոյից տասը սանդղակով, որտեղ տասը առավելագույնն է, կասեի, որ հանդիպումը անցել է տասներկուսի», – լրագրողներին հայտարարել է Թրամփը նախագահական ինքնաթիռում։
Բանակցությունների հիմնական թեման առևտրատնտեսական համաձայնագրի նախապատրաստումն էր, որը, ամերիկացի առաջնորդի խոսքով, կստորագրվի առաջիկայում։ Թրամփը նշել է, որ գործարքի ավարտի համար գրեթե ոչ մի լուրջ խոչընդոտ չի մնացել. քննարկումներին խոչընդոտող միակ խնդիրը Չինաստանի կողմից հազվագյուտ մետաղների արտահանման սահմանափակումներն էին, որոնք ռազմավարական նշանակություն ունեն բարձր տեխնոլոգիական ոլորտների համար։
Համաձայնագրի նախագծով Պեկինը համաձայնել է մեկ տարով հետաձգել սահմանափակումների կիրառումը, որից հետո մատակարարման պայմանները կվերանայվեն ամեն տարի։ Թրամփի խոսքով` այս քայլը Չինաստանի կողմից փոխզիջման գնալու պատրաստակամության կարևոր ազդանշան է։
Առանձին ուշադրություն են կողմերը դարձրել տեխնոլոգիական համագործակցությանը։ Թրամփը հայտարարել է, որ Չինաստանը մտադիր է բանակցություններ սկսել ամերիկյան Nvidia ընկերության հետ, որը միկրոչիպերի խոշորագույն արտադրողներից մեկն է։
«Մենք քննարկել ենք չիպերը, նրանք կխոսեն Nvidia-ի հետ», – ասել է նա։
ԱՄՆ նախագահը հիշեցրել է, որ ԱՄՆ–ն «բարեկամական մրցակցության» մեջ է Չինաստանի հետ արհեստական բանականության և կիսահաղորդիչների արտադրության ոլորտում՝ Միացյալ Նահանգներին անվանելով «արհեստական բանականության ոլորտում համաշխարհային գերտերություն»։
Այս խոսքերը հնչել են ԱՄՆ Առևտրի նախարարության կողմից առաջադեմ միկրոչիպերի և արհեստական բանականության մոդելների արտահանման վրա ավելի վաղ կիրառած սահմանափակումների ֆոնին։ Վաշինգտոնը պնդում է, որ միջոցառումները նպատակ ունեն կանխել ամերիկյան տեխնոլոգիաների օգտագործումը ռազմական ոլորտում և կիբեռհարձակումներում, սակայն Պեկինը դրանք որակել է որպես «տնտեսական ճնշում»։
Միևնույն ժամանակ Թրամփն ընդգծել է, որ Չինաստանի կողմից ռուսական նավթի գնման և Թայվանի թեմաները բանակցությունների ընթացքում չեն քննարկվել։
Հանդիպման ավարտին կողմերը պայմանավորվել են քաղաքական երկխոսության հետագա զարգացման մասին։ Թրամփը հայտնել է, որ ապրիլին նախատեսում է այցելել Չինաստան, իսկ դրանից հետո ակնկալում է, որ Սի Ծինփինը պատասխան այցով կգա ԱՄՆ։ Ամերիկացի առաջնորդի խոսքով՝ Չինաստանի նախագահին կընդունեն «Ֆլորիդայում կամ Վաշինգտոնում»։
ԱՄՆ նախագահ Դոնալդ Թրամփը և Չինաստանի նախագահ Սի Ծինփինը երկկողմ հանդիպում են անցկացրել Հարավային Կորեայի Բուսան քաղաքում։ Այս հանդիպումն առաջինն էր Թրամփի երկրորդ ժամկետից ի վեր։
Հանդիպումը տևել է մեկ ժամ 40 րոպե՝ ավելի երկար, քան նախատեսված էր ԱՄՆ նախագահի գրաֆիկով։ Դրա արդյունքների մասին Թրամփը պատմել է լրագրողներին արդեն ինքնաթիռում։ Սի Ծինփինը դեռ չի խոսել հանդիպման մասին։