ԵՐԵՎԱՆ, 26 հոկտեմբերի — Sputnik. Ռուսաստանի և ԱՄՆ–ի նախագահներ Վլադիմիր Պուտինի և Դոնալդ Թրամփի հանդիպման նախապատրաստական աշխատանքները շարունակվում են, սակայն գործընթացը բարդ է և պահանջում է լուրջ դիվանագիտական աշխատանք: Այս մասին հայտարարել է ՌԴ նախագահի մամուլի քարտուղար Դմիտրի Պեսկովը լրագրող Պավել Զարուբինին («Россия 1») տված հարցազրույցում։
«Նախագահները չեն կարող հանդիպել հանուն հանդիպման։ Նրանք չեն կարող պարզապես կորցնել իրենց ժամանակը, և նրանք բացահայտ խոսում են այդ մասին: Այդ պատճառով նրանք Լավրովին (ՌԴ արտգործնախարար Սերգեյ Լավրով–խմբ. ) և Ռուբիոյին (ԱՄՆ պետքարտուղար Մարկո Ռուբիո–խմբ.) հանձնարարել են նախապատրաստել այդ գործընթացը։ Գործընթացը բարդ է», - նշել է Պեսկովը։
Նա ընդգծել է, որ ռուս-ամերիկյան գագաթնաժողովի չեղարկման մասին խոսելը ճիշտ չէ, քանի որ դրա անցկացման ամսաթվի վերաբերյալ կոնկրետ պայմանավորվածություններ դեռ չեն եղել:
«Ամեն դեպքում հիշենք, որ գագաթնաժողովի որևէ ամսաթվի վերաբերյալ հստակ համաձայնություն չի եղել», - հավելել է Կրեմլի խոսնակը։
Պեսկովի խոսքով՝ հանդիպման նախապատրաստական աշխատանքները բարդանում են ոչ միայն օրակարգի ծավալով, այլև այն փաստով, որ ոչ բոլորն են հետաքրքրված դրա անցկացմամբ։
«Իհարկե ոչ բոլորն են ցանկանում, որ այս գագաթնաժողովը տեղի ունենա», - ընդգծել է նա։
Ավելի վաղ Սպիտակ տան պաշտոնական ներկայացուցիչ Կարոլին Լևիտը հայտարարել էր, որ Վաշինգտոնը չի հրաժարվում Դոնալդ Թրամփի և Վլադիմիր Պուտինի հանդիպման անցկացման ծրագրերից, սակայն դա կկայանա միայն այն դեպքում, եթե կարողանա «շոշափելի արդյունք» բերել:
Նրա խոսքով՝ ԱՄՆ նախագահը ցանկանում է համոզվել, որ Ռուսաստանի առաջնորդի հետ բանակցությունները կդառնան «նրա ժամանակի խելամիտ օգտագործում»: Լևիտը նաև հաստատել է, որ Թրամփի վարչակազմը հույս ունի՝ Ուկրաինայում հակամարտության խաղաղ կարգավորումն առաջ կընթանա, սակայն, նրա խոսքով, «Մոսկվայի կողմից բավարար շահագրգռվածություն չի տեսնում»:
Հիշեցնենք՝ հոկտեմբերի 16-ին տեղի է ունեցել Պուտինի և Թրամփի հեռախոսազրույցը, որն ամենաերկարատևներից մեկն էր 2025 թվականի սկզբից ի վեր։ Կողմերը քննարկել են, մասնավորապես, Ուկրաինայի շուրջ ստեղծված իրավիճակը։ Բանակցությունների արդյունքներով Թրամփը հայտարարել է, որ մտադիր է Բուդապեշտում Պուտինի հետ անձնական հանդիպում ունենալ։