ԵՐԵՎԱՆ, 26 հոկտեմբերի – Sputnik. Ֆրանսիայում ձերբակալել են երկու տղամարդու՝ Փարիզի աշխարհահռչակ Լուվրի թանգարանից վերջերս կատարված թանկարժեք զարդերի գողության գործով։ Այս մասին գրում է ֆրանսիական Le Parisien լրատվամիջոցը։
Հայտնել էինք, որ հոկտեմբերի 19–ին` վաղ առավոտյան, թալանել են Փարիզի Լուվրի թանգարանը։
«Կասկածյալներից մեկը ձերբակալվել է հոկտեմբերի 25–ին՝ տեղական ժամանակով ժամը 22:00-ին, երբ Փարիզի Շառլ դը Գոլ օդանավակայանում պատրաստվում էր նստել արտասահման մեկնող ինքնաթիռ։ Երկրորդ կասկածյալը ձերբակալվել է դրանից քիչ անց՝ Փարիզի տարածաշրջանում»,–գրում է լրատվամիջոցը։
Հիշեցնենք` դեպքի օրը ֆրանսիական լրատվամիջոցները հայտնել էին, որ հանցագործները գողացել են Նապոլեոնի ժամանակաշրջանի մի քանի ոսկյա իրեր՝ վզնոց, կրծքազարդ, գլխազարդ։ Հանցագործները հինգն են եղել, որ ներս են մտել Սենա գետի կողմից, բարձրացել են բեռնատար վերելակով, կոտրել ապակիներն ու ներս մտել հավաքածուի սրահ: