ԵՐԵՎԱՆ, 26 հոկտեմբերի - Sputnik. Գյումրու քաղաքապետ Վարդան Ղուկասյանին նոր մեղադրանք է առաջադրվել։ Այս մասին հայտարարություն է տարածել Ղուկասյանի պաշտպանական թիմը։
Նշվում է, որ նոր մեղադրանքը կապված է 2025 թվականի սեպտեմբերի 16-ին և 23-ին Գյումրու քաղաքապետ Վարդան Ղուկասյանի` ՀՀ հակակոռուպցիոն դատարանի բակում արած հայտարարությունների հետ։
«Նոր մեղադրանքն առաջադրվել է Հայաստանի այլ երկրների հետ միություն կազմելու վերաբերյալ Ղուկասյանի մտքերի համար։ Դրանք «որակվել են» որպես Հայաստանի Հանրապետության ինքնիշխանությունից հրաժարվելուն ուղղված հրապարակային կոչ (ՀՀ քրեական օրենսգրքի 422-րդ հոդվածի 2-րդ մասով)։ Գտնում ենք, որ այս մեղադրանքը որևէ աղերս չունի ՀՀ քրեական օրենսգրքի 422-րդ հոդվածի հետ և պարզապես քաղաքական հետապնդման դրսևորում է»,–նշված է հայտարարության մեջ։
Ընդգծվում է, որ Վարդան Ղուկասյանը, օգտվելով իր հիմնարար իրավունքից, ընդամենը կարծիք է արտահայտել։
«Բռնության տարրեր չպարունակող խոսքը, որն իրականում եղել է ընդամենը դիրքորոշում, անձնական կարծիք, միջազգային բոլոր չափորոշիչների և Մարդու իրավունքների եվրոպական դատարանի կողմից մշակված սկզբունքների համատեքստում չի կարող երբևէ որակվել որպես հանցագործություն»,–նշել են պաշտպանները։
Նրանք դատապարտել են հարուցված քրեական հետապնդումը` շեշտելով, որ հնարավոր բոլոր իրավական գործիքների կիրառմամբ պայքարելու են խաթարված արդարությունը վերականգնելու համար։
Հիշեցնենք՝ հոկտեմբերի 20-ին ուժայինները ներխուժեցին Գյումրու քաղաքապետարան, որպեսզի բերման ենթարկեն համայնքապետ Վարդան Ղուկասյանին։ Հակակոռուպցիոն կոմիտեն հայտարարեց, որ 8 անձ է ձերբակալվել մի խումբ պաշտոնատար անձանց կողմից խոշոր չափերով կաշառք ստանալու, վերջիններիս կաշառք տալու մեղադրանքներով։ Ժամեր անց Ղուկասյանն ինքը դուրս եկավ համայնքապետարանի շենքից և մոտեցավ իրավապահների ավտոմեքենային։ Այդ ընթացքում քաշքշուկ սկսվեց համայնքապետարանի շենքը շրջապատած ոստիկանների ու համայնքապետի կողմնակիցների միջև։ Ուժայինները 23 մարդու ձերբակալեցին։
ՀՀ քննչական կոմիտեն հայտնեց, որ քրեական վարույթ է նախաձեռնվել Գյումրիում զանգվածային անկարգություններին մասնակցելու, արդարադատության իրականացումը խոչընդոտելու հատկանիշներով։
Հոկտեմբերի 21-ի առավոտյան Գյումրու համայնքապետ Վարդան Ղուկասյանը կալանավորվեց 2 ամսով։