ԵՐԵՎԱՆ, 18 հոկտեմբերի – Sputnik. «Մեր ձևով» շարժումը վաղը կազմակերպելու է ուխտագնացություն դեպի Մայր աթոռ Սուրբ Էջմիածին։ ԱԱԾ–ի շենքի մոտ այս մասին հայտարարեց Սամվել Կարապետյանի եղբորորդին` շարժման համակարգող Նարեկ Կարապետյանը։
«Գնալու ենք Էջմիածին և դրանով ցույց ենք տալու, որ Էջմիածինն անպաշտպան չէ։ Հայերը պաշտպանելու են Էջմիածինը հիմա այնպես, ինչպես Սարդարապատի ժամանակ և ինչպես միշտ են դա արել»,- ասաց Կարապետյանը։
«Մեր ձևով» շարժման համակարգող խորհրդի անդամ Ալեքսան Ալեքսանյանը նշեց, որի վաղը՝ 17։30-ին, կհավաքվեն Էջմիածնում։
Հիշեցնենք` այսօր Ազատության հրապարակում հանրահավաք անցկացվեց ի աջակցություն կալանավորված գործարար Սամվել Կարապետյանի, Հայ առաքելական եկեղեցու հոգևոր հայրերի և բոլոր քաղբանտարկյալների։ Այնուհետև հանրահավաքի մասնակիցները քայլերթով շարժվեցին դեպի ՀՀ ազգային անվտանգության շենք, որտեղ պահվում են Միքայել և Բագրատ սրբազանները, բարերար, գործարար Սամվել Կարապետյանը։