ԵՐԵՎԱՆ, 7 հոկտեմբերի – Sputnik. Հայաստանի իշխանությունների վարած արտաքին քաղաքականությունը ռացիոնալ աշխարհաքաղաքականության հետ կապ չունի։ Այսօր լրագրողների հետ հանդիպմանը ասաց ՀՀ երկրորդ նախագահ Ռոբերտ Քոչարյանը։ Նրա կարծիքով՝ Հայաստանի՝ Եվրամիության անդամակցության մասին հայտարարությունները զուտ իմիտացիա են։
«Ինչո՞ւ իմիտացիա, որովհետև դեկլարատիվ է, քանի որ ԵՄ անդամակցության համար շատ հստակ կանոնակարգ կա։ Հետաքրքիր է, չէ՞, որ ԱԳՆ-ում ստեղծվել է ԵՄ վերաինտեգրման վարչություն, բայց չկա ինտեգրում։ Հետևաբար, ռացիոնալ բացատրություն այդ քայլերին չեմ տեսնում։ ԵՄ անդամակցություն չի երևում՝ դա ցանկություն և իմիտացիա է, բայց ՌԴ-ից դու արդեն ցանկանում ես հեռանալ»,- ասաց Քոչարյանը։
Քոչարյանի կարծիքով՝ ԵՄ-ում այսօր առաջնորդության լուրջ ճգնաժամ կա։
«Անկեղծ ասած, երբ այդ կադրը տեսա, որ Սպիտակ տանը հերթով նստած են ԵՄ առաջնորդները, մեծ ջանքեր գործադրեցի, որ այդ շարքում նստած պատկերացնեի ոչ թե Մակրոնին, այլ Ժակ Շիրակին, Բեռլուսկոնիին, որ անհամբեր սպասեն, թե Զելենսկու հետ Թրամփը ե՞րբ կավարտի, ու իրենց կընդունի, թե ոչ։ Սա առաջնորդության լրջագույն ճգնաժամ է Եվրոպայում»,- ասաց նա։
Հայաստանի 2–րդ նախագահը հավելեց, որ ՀՀ իշխանությունների վարած արտաքին քաղաքականության հետ կապված հարցերին դժվարանում է պատասխանել, քանի որ, ըստ նրա, հիմքում տրամաբանութուն չկա, որը կարելի է վերլուծել։