ԵՐԵՎԱՆ, 24 սեպտեմբերի – Sputnik. Առանց Ռուսաստանի եվրոպական անվտանգության մասին բոլոր խոսակցությունները անհիմն են, ասել է ՌԴ նախագահի մամուլի քարտուղար Դմիտրի Պեսկովը ՌԲԿ ռադիոկայանին տված հարցազրույցում։
«Դուք չեք կարող լուծել եվրոպական անվտանգության հարցը ի վնաս Ռուսաստանի անվտանգության։ Առավել ևս, անկախ նրանից, թե ով ինչ է ասում, նույնիսկ հիմա Ռուսաստանը եվրոպական անվտանգության անբաժանելի մասն է։ Հետևաբար, առանց Ռուսաստանի կամ ի վնաս Ռուսաստանի անվտանգության մասին բոլոր խոսակցությունները առնվազն անհիմն են։ Իրականում վտանգավոր են և անընդունելի մեզ համար», – հայտարարել է Պեսկովը։
Նա հիշեցրել է, որ ՌԴ նախագահ Վլադիմիր Պուտինը բազմիցս առաջարկել է ամբողջ աշխարհին վերացնել Ուկրաինայի հետ հակամարտության սկզբնապատճառները, սակայն ԱՄՆ-ն և Եվրոպան հրաժարվել են։ Եվրոպան ասում էր, որ Ռուսաստանը չպետք է մասնակցի եվրոպական անվտանգության հարցերի քննարկմանը։ Իսկ դա հակասում է անվտանգության անբաժանելիության մասին կանխադրույթին։
Ավելի վաղ Պեսկովը հայտարարել էր, որ եվրոպացիները խանգարում են ուկրաինական ճգնաժամի լուծման գործընթացին։