Կուզեի մեկ օրով Մեսսին լինել. Գևորգ Ղազարյանը` ֆուտբոլի մասին և ոչ միայն

2 տարի առաջ ՀՖՖ–ն մի տեսանյութ հրապարակեց, որում Ազգային հավաքականի ֆուտբոլիստ Գևորգ Ղազարյանը հայտարարում էր, որ պատրաստվում է ավարտել ֆուտբոլային կարիերան։ Տեսանյութն առանց հուզմունքի դիտելն անհնար էր անգամ ոչ ֆուտբոլասերների համար։ Մարզիկը նույնպես հուզվել էր. չէր կարողանում արտահայտել զգացմունքները։

Չնայած մարզիկը հիմա էլ ֆուտբոլից մեղմ ասած` հեռու չէ ( նա «Արարատ– Արմենիա» ակումբի մարզիչներից մեկն է), բայց ասում է, որ նույն զգացմունքները չեն` ֆուտբոլ խաղալն ու ֆուտբոլում լինելը տարբեր բաներ են։

«Դժվար թե ինչ–որ ուրիշ գործ այդ բացը լրացնի։ Ես ֆուտբոլը սիրում եմ, ֆուտբոլի մեջ եմ, բայց այնպես, ինչպես սիրում էի ֆուտբոլ խաղալ, էլ ոչինչ չկա»,– նշում է նա։

Գևորգ Ղազարյանը սպորտով սկսել է զբաղվել 7 տարեկանում։ Հարևանն է բակում տեսել տղայի խաղը ու տարել մարզադաշտ։ Այդ ժամանակվանից ի վեր, ինչպես ինքն է բնութագրում, ուշքն ու միտքը միայն ֆուտբոլն է։ Կյանքի ամենահիշարժան պահը նա համարում է Հայաստանի ազգային հավաքականի մարզաշապիկով առաջին անգամ մարզադաշտ դուրս գալը։ Ու չնայած հանուն արդյունքի իրեն շատ բաներից է զրկել, բայց համոզված է` արժեր։

«Ցանկացած ֆուտբոլիստ, որ որոշում է դառնալ պրոֆեսիոնալ մարզիկ, պետք է հասկանա դա։ Պետք է պատրաստ լինի, որ իրեն զրկելու է շատ բաներից` հասարակ առիթներից, ուրախություններից սկսած։ Պետք է ինքն իր մեջ դաստիարակի կարգապահություն, պատրաստ լինի դժվար կյանքի, մինչև որ հասնի այն արդյունքին, որն իրեն պետք է»,– ասում է ֆուտբոլիստը։

Եթե հնարավորություն ունենար հանդիպել համաշխարհային ֆուտբոլի աստղերից մեկին, կընտրեր Զինեդին Զիդանին, իսկ եթե հնարավորություն ունենար մեկ օրով նրանցից մեկի տեղում հայտնվել` կընտրեր Լիոնել Մեսսիին։

«Որ իր նման խաղ ցույց տայի, դաշտում` այդքան խաղացողների մեջ, ինչ ուզեի` անեի»,– ասում է Ղազարյանը։

Խոսելով Հայաստանի ազգային հավաքականի մասին` Գևորգ Ղազարյանն ասում է, որ մեր թիմը հաջողության կհասնի այն ժամանակ միայն, երբ բոլոր գծերում հզոր և մարտունակ թիմ ունենանք, իսկ դա կլինի միայն այն դեպքում, երբ երկրում սկսի զարգանալ մանկապատանեկան ֆուտբոլը։

«Պետք է կայացնենք շատ բարդ ու դժվար որոշումներ, ժամանակավոր արդյունքը դնենք մի կողմ ու զբաղվենք մանկապատանեկան ֆուտբոլով, կարողանանք մեր ֆուտբոլիստներին հասցնել այն մակարդակի, որ ունենանք ուժեղ հավաքական։ Նրանց էլ գումարվեն սփյուռքի խաղացողները, և ունենաք հզոր թիմ», ասում է նա։

Իսկ հավանո՞ւմ է արդյոք Գևորգ Ղազարյանը մեր ազգային հավաքականի ներկայիս կազմը, կիմանաք` դիտելով տեսանյութը։