ԵՐԵՎԱՆ, 17 սեպտեմբերի – Sputnik. Կենտրոնական Ասիայի պետությունների համար հիմնական սպառնալիքը Մերձավոր Արևելքից դեպի ՀԱՊԿ-ի հարավային սահմաններ արմատական ծայրահեղական խմբավորումների տեղափոխման իրական հնարավորությունն է։ Այս մասին հայտարարել է միավորման գլխավոր քարտուղար Իմանգալի Տասմագամբետովը։
«Աշխարհի տարբեր տարածաշրջաններում ի հայտ են գալիս լարվածության նոր օջախներ, սրվում են հին հակամարտությունները։ Կենտրոնական Ասիայի տարածաշրջանի պետությունների համար հիմնական սպառնալիքը Մերձավոր Արևելքից դեպի տարածաշրջանի պետությունների հարավային սահմաններ արմատական ծայրահեղական խմբավորումների տեղափոխման, մեր երկրների տարածքում նրանց գաղափարախոսության տարածման, ահաբեկչական կազմակերպություններում երիտասարդների ներգրավման իրական հնարավորությունն է»,-ասել է Տասմագամբետովը Կենտրոնական Ասիայի տարածաշրջանի արագ տեղակայման հավաքական ուժերի հետ «Սահման-2025» հրամանատարաշտաբային վարժանքի բացման արարողության ժամանակ։
Գլխավոր քարտուղարի խոսքով՝ այս պայմաններում մարտական խնդիրների հաջող լուծման համար անհրաժեշտ է ազգային զինված ուժերի, տարածաշրջանի պետությունների այլ ուժային կառույցների և ՀԱՊԿ հավաքական ուժերի հստակ փոխգործակցություն:
«Սահման-2025» զորավարժություններն անցկացվում են Ղրղզստանի Բալիկչի քաղաքում՝ Իսիկ Կուլի ափին գտնվող «Էդելվեյս» զորավարժարանում: Զորավարժություններին մասնակցում են Ռուսաստանի, Ղրղզստանի, Ղազախստանի և Տաջիկստանի զորակազմերը։