ԵՐԵՎԱՆ, 15 սեպտեմբերի – Sputnik. Հնդկաստանի հետ ԵԱՏՄ բանակցությունների առաջին փուլը տեղի կունենա նոյեմբերի սկզբին Հնդկաստանում և նվիրված կլինի ապագա գործարքի առանցքային հարցերի քննարկմանը։ Տեղեկությունը հայտնում է ԵՏՀ–ն։
Բանակցությունների ընթացքի հարցը քննարկվել է այսօր Նյու Դելիում ԵՏՀ առևտրի նախարար Անդրեյ Սլեպնյովի և Հնդկաստանի առևտրի և արդյունաբերության նախարար Պիյուշ Գոյալի հանդիպման ժամանակ։
Ըստ հանձնաժողովի հաղորդագրության՝ կողմերը քննարկել են ճանապարհային քարտեզի համաձայնեցումը, որն ուղղված է ԵԱՏՄ և Հնդկաստանի միջև արագացված ձևաչափով ազատ առևտրի մասին արդյունավետ բանակցությունների անցկացմանն աջակցելուն:
Առաջին փուլին կնախորդեն Հնդկաստանի գործընկերների և ԵԱՏՄ անդամ պետությունների հետ ԵՏՀ խորհրդակցությունները: Նախարարները պայմանավորվել են կանոնավոր շփումներ անցկացնել բանակցություններին համակողմանի աջակցություն ցուցաբերելու համար։
Հնդկաստանի հետ ազատ առևտրի գոտու մասին համաձայնագրի կնքման շուրջ բանակցություններ սկսելու մասին որոշումը Եվրասիական տնտեսական բարձրագույն խորհուրդն ընդունել էր 2016 թվականի դեկտեմբերի 26-ին: