ԵՐԵՎԱՆ, 12 սեպտեմբերի - Sputnik. Եվրոպացիները խանգարում են ուկրաինական ճգնաժամի կարգավորման գործընթացին։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը:
«Այն, որ եվրոպացիները խանգարում են, դա իրոք այդպես է ու ոչ մեկի համար գաղտնիք չէ», – լրագրողներին ասել է Պեսկովը:
Նա հիշեցրել է, որ հենց Եվրոպան էր ՆԱՏՕ-ի կազմում շարժվում դեպի Ռուսաստանի սահմաններ։
«Ռուսաստանը չէր շարժվում դեպի Եվրոպա՝ իր ռազմական ենթակառուցվածքներով, այլ Եվրոպան է,- լինելով ՆԱՏՕ-ի՝ Հյուսիսատլանտյան դաշինքի կազմում, որը առճակատման գործիք է, այլ ոչ թե խաղաղության և կայունության,- միշտ շարժվել դեպի մեր սահմանները», - ասել է Պեսկովը։
Ինչպես նշել է ՌԴ նախագահի խոսնակը, Արևմտյան Եվրոպան Ռուսաստանի նկատմամբ որդեգրել է թշնամական դիրքորոշում:
«Հիմա, երբ Արևմտյան Եվրոպան թշնամական դիրքորոշում է որդեգրել մեր նկատմամբ, բնականաբար, այդ ամենը (զորավարժությունների անցկացումը – խմբ.) հարուցում է նման ծանր զգացունքային արձագանք», – ասել է Պեսկովը ՝ մեկնաբանելով «Արևմուտք-2025» զորավարժությունների անցկացման կապակցությամբ եվրոպացիների արձագանքը:
Միևնույն ժամանակ, նա ընդգծել է, որ Ռուսաստանը շարունակում է պատրաստակամ մնալ Ուկրաինայի հակամարտությունը խաղաղ երկխոսության ճանապարհով կարգավորելու հարցում:
Նրա խոսքով՝ պետք է կայծակնային արդյունքներ չակնկալել։
«Անշուշտ, պետք է հանել վարդագույն ակնոցները և չակնկալել, որ բանակցային գործընթացը կայծակնային արդյունքներ կտա։ Ես ուզում եմ ձեզ հիշեցնել, հավանաբար, ԱՄՆ նախագահ Դոնալդ Թրամփի խոսքերը։ Նա ասել է, որ սկզբում կարծում էր, թե կհաջողվի ամեն ինչ շատ կարճ ժամկետում կարգավորել, բայց հետո հասկացավ, որ դրա համար ավելի շատ ժամանակ է պետք», – ասել է Պեսկովը՝ պատասխանելով հարցին, թե արդյոք բանակցային գործընթացը փակուղի չի մտել։