ԵՐԵՎԱՆ, 10 սեպտեմբերի – Sputnik. Լեհաստանի վարչապետ Դոնալդ Տուսկը պնդում է, որ Լեհաստանի երկնքում խոցվել են «վտանգ ներկայացնող» ԱԹՍ–ներ, և կարծում է, որ դրանք ռուսական են եղել: Տեղեկությունը հայտնում է ՌԻԱ Նովոստին։
Ավելի վաղ Վարշավայում ՌԴ արտակարգ և լիազոր դեսպան Սերգեյ Անդրեևը ՌԻԱ Նովոստիին ասել էր, որ լեհական կողմը, բազմիցս մեղադրելով Ռուսաստանին իր օդային տարածքը խախտելու մեջ, ոչ մի անգամ ապացույց չի ներկայացրել:
«Մեր երկնքում դրոններ են խոցվել, որոնք սպառնալիք էին ներկայացնում։ Սա առաջին դեպքն է, երբ ռուսական դրոններ են խոցվում ՆԱՏՕ-ի պետության օդային տարածքում», - առանց որևէ ապացույցի ասել է Տուսկը։
Նա ավելի վաղ հայտարարել էր, որ գիշերը խախտվել է Լեհաստանի օդային տարածքը, ձեռնարկվում են համապատասխան միջոցներ: Լեհ զինվորականներն իրենց հերթին պնդում են, որ խոցել են երկրի օդային տարածքը խախտած մի քանի ԱԹՍ։
Նշենք, որ լեհական կողմն իր օդային տարածքը խախտելու անհիմն մեղադրանքներ նախկինում էլ է ներկայացրել Ռուսաստանին։ Մասնավորապես 2022 թվականի վերջին Ուկրաինայի հետ սահմանի մոտ՝ Լեհաստանի տարածքում, արկեր էին ընկել, 2 մարդ էր մահացել։ Սկզբում Վարշավան պնդում էր, որ խոսքը ռուսական արտադրության արկերի մասին է, բայց հետագայում Լեհաստանի այդ ժամանակվա նախագահ Անջեյ Դուդան խոստովանեց, որ դա, ամենայն հավանականությամբ, ուկրաինական զինամթերք է։ AP գործակալության տվյալներով՝ դրանք ուկրաինական հրթիռներ էին, որոնք արձակվել էին ռուսական հրթիռներ որսալու նպատակով։ Փորձագետների եզրակացությունների համաձայն՝ դեպքի վայրից հրապարակված լուսանկարներում պատկերված էին С-300 ՀՕՊ համալիրի ուկրաինական հրթիռի բեկորներ: