ԵՐԵՎԱՆ, 1 սեպտեմբերի – Sputnik. Ադրբեջանի ԱԳՆ-ն պնդում է, որ ԵԱՀԿ-ն փակել է Մինսկի խումբն ու նրա հետ առնչություն ունեցող կառույցները։ Նշվում է, որ նման որոշում է կայացրել ԵԱՀԿ նախարարական խորհուրդը, և ԵԱՀԿ շրջանակում նախկինում ընդունված բոլոր որոշումները, որոնք վերաբերում են հայ-ադրբեջանական «նախկին հակամարտությանը», կորցնում են իրենց ուժը և ենթակա չեն կիրառման:
ԵԱՀԿ քարտուղարությանը հանձնարարվել է ավարտել լուծարումը ոչ ուշ, քան մինչև 2025 թ. դեկտեմբերի 1–ը։
Մինսկի խումբը ԵԱՀԿ անդամ երկրների խումբ է, որը փնտրում էր Ղարաբաղյան հակամարտության խաղաղ կարգավորման ուղիներ։
Այս հարցով ՀՀ ԱԳՆ–ի մեկնաբանությունն այս պահին չկա։
ԵԱՀԿ Մինսկի խումբը ստեղծվել է 1992 թվականին, որի համանախագահներն են Ռուսաստանը, Ֆրանսիան և ԱՄՆ–ն։ 2022 թ. ապրիլին Ռուսաստանի արտգործնախարար Սերգեյ Լավրովը հայտնել էր, որ Փարիզն ու Վաշինգտոնը հրաժարվել են խմբի շրջանակում Մոսկվայի հետ համագործակցությունից՝ հայտարարելով, որ իրենք չեն շփվի այդ ձևաչափով։
Հիշեցնենք, որ Հայաստանի և Ադրբեջանի ԱԳ նախարարները օգոստոսի 8-ին Վաշինգտոնում նախաստորագրել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը, որի մաս է կազմում ԵԱՀԿ Մինսկի խմբի և դրա հետ կապված կառույցների լուծարման մասին համատեղ դիմումը: