ԵՐԵՎԱՆ, 31 օգոստոսի - Sputnik. Ռուսաստանի նախագահ Վլադիմիր Պուտինը դեռ չի շփվել Ադրբեջանի առաջնորդ Իլհամ Ալիևի հետ, սակայն ռուսական պատվիրակության անդամներն ակտիվ շփվել են ադրբեջանցի գործընկերների հետ: Այս մասին լրագրողներին ասել է ՌԴ նախագահի օգնական Յուրի Ուշակովը։
«Առայժմ, իմ կարծիքով, ոչ»,-պատասխանել է նա այն հարցին, թե արդյոք Պուտինին հաջողվել է շփվել Ալիևի հետ:
Միաժամանակ Ուշակովը հավելել է, որ ռուսական պատվիրակության անդամներն ակտիվորեն շփվել են Ադրբեջանի գործընկերների հետ:
Ռուս–ադրբեջանական հարաբերությունները լարվել են այս ամռանից, երբ ՌԴ–ում էթնիկ ադրբեջանցիների ձերբակալություններ տեղի ունեցան` սպանությունների մեղադրանքով, իսկ Բաքվում ձերբակալվեցին ՌԴ քաղաքացիներ, այդ թվում Sputnik Ադրբեջանի ղեկավարն ու գլխավոր խմբագիրը, որոնք ՌԴ քաղաքացիներ են։։
2025 թվականի օգոստոսի 31-ից սեպտեմբերի 1-ը Չինաստանի Թիենծին քաղաքում անցկացվում է Շանհայի համագործակցության կազմակերպության (ՇՀԿ) գագաթնաժողովը։ Չինաստան են ժամանել մի շարք երկրների, այդ թվում՝ Հայաստանի, Ռուսաստանի, Բելառուսի, Հնդկաստանի, Թուրքիայի, Ադրբեջանի ղեկավարները:
ՇՀԿ-ն միջազգային կազմակերպություն է, որը հիմնադրվել է 2001 թվականին: Այն ներառում է Հնդկաստանը, Իրանը, Ղազախստանը, Չինաստանը, Ղրղզստանը, Ռուսաստանը, Տաջիկստանը, Պակիստանը և Ուզբեկստանը, իսկ 2024 թվականի հուլիսի 4-ին Աստանայի գագաթնաժողովում կազմակերպությանը պաշտոնապես միացավ Բելառուսը։ Դիտորդ երկրներ են Աֆղանստանը և Մոնղոլիան, ՇՀԿ երկխոսության գործընկեր երկրներ են Հայաստանը, Ադրբեջանը, Բահրեյնը, Եգիպտոսը, Կամբոջան, Կատարը, Քուվեյթը, Մալդիվները, Մյանման, Նեպալը, Արաբական Միացյալ Էմիրությունները, Սաուդյան Արաբիան, Թուրքիան, Շրի Լանկան: