ԵՐԵՎԱՆ, 26 օգոստոսի - Sputnik. Իսրայելի պաշտպանության բանակը (ՑԱԽԱԼ) ավարտել է Գազայի հատվածի կենտրոնական հատվածում պաղեստինցի արմատականների երկու ստորգետնյա թունելների ոչնչացման գործողությունը: Այս մասին հայտնում է բանակի մամուլի ծառայությունը։
Մամուլի ծառայությունից հավելել են, որ թունելներից մեկն օգտագործվել է պաղեստինյան ՀԱՄԱՍ շարժման զինյալների կողմից և հագեցած է եղել զենքի պահեստներով, քնելու համար նախատեսված սենյակներով, սանհանգույցներով և խոհանոցով: Նշվում է, որ իսրայելցի զինվորականներն այն բետոնով են լցրել։ Մոտ հարյուր մետր երկարությամբ երկրորդ թունելը պայթեցվել է։
ՑԱԽԱԼ-ի ուժերը տասնյակ զինյալների են վերացրել և Գազայի կենտրոնական մասում ոչնչացրել են արմատականների ենթակառուցվածքները:
Հիշեցնենք` 2023 թ. հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Դրանից հետո պաղեստինյան ՀԱՄԱՍ շարժման գրոհայինները ներխուժեցին սահմանամերձ շրջաններ՝ կրակ բացելով զինվորականների և քաղաքացիական անձանց վրա։ Նրանք պատանդ վերցրին ավելի քան 200 անձանց: Իշխանությունների տվյալներով՝ իսրայելական կողմից այդ ժամանակ զոհվեց մոտ 1,2 հազար մարդ։
Իսրայելի պաշտպանության բանակն ի պատասխան սկսեց «Երկաթե թրեր» գործողությունը և հայտարարեց Գազայի հատվածի ամբողջական շրջափակման մասին. դադարեցվեցին ջրի, էլեկտրականության, վառելիքի, սննդամթերքի և դեղորայքի մատակարարումները:
Գազայի վարչակազմի տվյալներով՝ 2023 թվականի հոկտեմբերի 7-ից ի վեր իսրայելական հարձակումների հետևանքով զոհերի թիվը գերազանցել է 62 հազարը, մեծ մասը խաղաղ բնակիչներ են։