ԵՐԵՎԱՆ, 26 օգոստոսի – Sputnik. Տարեսկզբից ի վեր Իսպանիայում բռնկված անտառային հրդեհների մակերեսը գերազանցել է 410 հազար հեկտարը, ինչը գրեթե 10 անգամ շատ է, քան ամբողջ 2024 թվականին։ Տեղեկությունը հայտնում է ՌԻԱ Նովոստին՝ հղում անելով Եվրոպական անտառային հրդեհների տեղեկատվական համակարգի (EFFIS) թարմացված տվյալներին։
Իսպանիայի վարչապետ Պեդրո Սանչեսն ավելի վաղ հայտարարել էր, որ երկրում հրդեհների հետ կապված իրավիճակը դեռ լուրջ է։ «Español» թերթի տվյալներով` հրդեհների պատճառով հազարավոր մարդիկ են տարհանվել երկրի մի քանի շրջաններից։
Ըստ ծառայության՝ հունվարից մինչև հուլիսի վերջ երկրում (հիմնականում հյուսիսային և արևմտյան մասերում) գրանցվել է hրդեհի առնվազն 252 օջախ, ինչի հետևանքով այրվել է 411 315 մակերես։
Համեմատության համար՝ 2024 թվականին գրանցված 219 հրդեհների մակերեսը կազմել է 42 615 հեկտար։
Բացի այդ, աճել է ավելի քան 500 հեկտար մակերես ընդգրկող անտառային հրդեհների թիվը։
2025 թվականին հրդեհներից տուժած մակերեսը գերազանցել է նաև 2023 թվականի (371 հրդեհ, 91,220 հեկտար) և 2022 թվականի ցուցանիշները։ Մինչ այժմ ռեկորդային էր համարվում 2022 թվականը, երբ 493 հրդեհի հետևանքով 306 555 հեկտար մակերես էր այրվել։