ԵՐԵՎԱՆ, 21 օգոստոսի - Sputnik. Թուրքիայի նախագահի աշխատակազմը հերքել է ԶԼՄ-ների հաղորդագրություններն այն մասին, թե իշխանությունները մտադիր են երկրի խոշոր խանութներում «ժողովրդական բաժիններ» ստեղծել՝ գների բարձրացման դեմ պայքարելու նպատակով։
Ինչպես գրում է ՌԻԱ Նովոստին՝ հղում անելով կառավարամետ Yeni Şafak թերթին, այսօր հաղորդվել է հանրապետության խանութներում «ժողովրդական բաժիններ» ստեղծելու իշխանությունների նախագծի մասին։ Պարբերականի տվյալներով՝ նախագիծը ենթադրում է բարձրացնել հիմնական սննդամթերքի հասանելիությունը ցածր եկամուտ ունեցող բնակչության համար։
«Նշված «ժողովրդական բաժին» (cumhur reyonu) արտահայտությունը չի արտացոլում պետական քաղաքականությունը, այլ ընդամենը մի թերթում հնչած գաղափար է։ Պաշտոնական կառույցներն այս առաջարկը չեն ընդունել և դրա իրականացման վերաբերյալ ոչ մի որոշում չի կայացվել»,-ասվում է Թուրքիայի նախագահի աշխատակազմի հաղորդակցության վարչության ապատեղեկատվության դեմ պայքարի կենտրոնի հայտարարության մեջ։
Գերատեսչությունն ընդդիմությանը մեղադրել է այդ նախաձեռնությունը որպես կառավարական նախագիծ ներկայացնելու մեջ։
«Կառավարության կամ համապատասխան հաստատությունների օրակարգում «сumhur reyonu» կոչվող որևէ նախագիծ չկա։ Թերթի սյունակում տեղ գտած առաջարկը որպես պետական քաղաքականություն ներկայացնելը՝ քաղաքական բանավեճ առաջացնելու նպատակով, մոլորեցնում է հանրությանը և հող է ստեղծում ապատեղեկատվության համար»,-ասվում է հայտարարության մեջ:
Թուրքիայի վիճակագրության ինստիտուտ հայտնում է, որ տարեկան գնաճը երկրում հուլիսին նվազել է մինչև 33,52 տոկոս՝ հունիսի 35,05 տոկոսից։ Ըստ ENAG անկախ տնտեսագետների խմբի՝ սպառողական գների ինդեքսը հուլիսին աճել է 3,75 տոկոսով, իսկ վերջին 12 ամիսների ընթացքում գների աճը կազմել է 65,15 տոկոս։
Ավելի վաղ Թուրքիայի կենտրոնական բանկի ղեկավար Ֆաթիհ Կարան հայտարարել էր կարգավորչի կանխատեսումները, ըստ որոնց՝ 2025 թվականի վերջին 25-29 տոկոս գնաճ է սպասում, իսկ 2026 թվականի վերջին ցուցանիշը կնվազի մինչև 13-19 տոկոս։