Օվերչուկը հաջորդ շաբաթ Հայաստան կայցելի. ի՞նչ թեմաներ են քննարկվելու

ԵՐԵՎԱՆ, 15 օգոստոսի – Sputnik. ՌԴ փոխվարչապետ Ալեքսեյ Օվերչուկը հաջորդ շաբաթ Երևան կայցելի՝ քննարկելու Եվրասիական տնտեսական միությունում (ԵԱՏՄ) Հայաստանի աշխատանքը։

Նա լրագրողներին ասել է, որ ուղևորությունը նախապես է ծրագրվել։

Քանի որ դրանից հետո Վաշինգտոնում արդեն եռակողմ հանդիպում է կայացել, ստորագրվել է հռչակագիր՝ Հայաստանի, ԱՄՆ-ի և Ադրբեջանի ղեկավարների մասնակցությամբ, ակնկալվում է, որ Օվերչուկը ՀՀ վարչապետ Նիկոլ Փաշինյանի հետ կքննարկի նաև բանակցությունների արդյունքները։

«Հնարավոր է` Նիկոլ Վովաևիչ Փաշինյանի հետ հանդիպում լինի և մենք որոշ նրբություններ քննարկենք, որոնք նախևառաջ կապված են Հարավային Կովկասի տարածաշրջանում հաղորդակցությունների ապաշրջափակման հետ», – ասել է ՌԴ փոխվարչապետը։

Նա նշել է, որ Ռուսաստանի համար կարևոր են Հարավային Կովկասում իր շահերին վերաբերող հարցերը, այդ թվում՝ երկաթուղային հաղորդակցությունների զարգացումը։

«Հաջորդ շաբաթվա վերջին նախատեսվում է հանդիպում նաև ադրբեջանական կողմի հետ, մենք այնտեղ ևս կքննարկենք այդ հարցերը, այնպես որ, շարժ կա», – հավելել է Օվերչուկը:

Հարցին` արդյոք այդ հանդիպումը կլինի Բաքվում, Օվերչուկը պատասխանել է, որ հանդիպումը «կկայանա Ռուսաստանում»:

Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան: ԱՄՆ–ն ճանապարհը վարձակալում է 99 տարով` ևս 99 տարով երկարաձգելու հնարավորությամբ։

Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ նախաստորագրեցին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։ Երկու երկրների արտգործնախարարները նաև համատեղ ուղերձ են ստորագրել ԵԱՀԿ Մինսկի խումբը և դրան առնչվող կառույցները լուծարելու վերաբերյալ։