ԵՐԵՎԱՆ, 12 օգոստոսի – Sputnik. Երուսաղեմում տղամարդ է ձերբակալվել Լացի պատի վրա հետևյալ բովանդակությամբ գրություն թողնելու համար. «Գազայում Շոա է տեղի ունենում» (այդպես են հրեաներն անվանում Հոլոքոստը)։ Տեղեկությունը հայտնում է իսրայելական 12-րդ ալիքը։
Ավելի վաղ հայտնվել էր Լացի պատի հարավային հատվածի լուսանկարը (նախատեսված է աղոթքի համար՝ անկախ սեռից), որի վրա անհայտ անձինք գրություն էին թողել՝ կոչ անելով ուշադրություն դարձնել Գազայի հատվածում տեղի ունեցող ողբերգությանը։ Մինչ այդ նմանատիպ գրություն էր հայտնվել Երուսաղեմի գլխավոր սինագոգի պատին՝ քաղաքի կենտրոնում գտնվող Քինգ Ջորջ փողոցում։
Լացի պատի և սրբավայրերի րաբբի Շմուել Ռաբինովիչը դատապարտել է չարագործների գործողությունները և նշել, որ սրբավայրերը չպետք է բողոքի վայրեր դառնան։ Նա կոչ է արել հետաքննել միջադեպը, գտնել մեղավորներին և հանձնել նրանց դատարանին։
«IsraelInfo»–ի տվյալներով՝ ոստիկանությունը սրբազան վայրում քաղաքական բնույթի վանդալիզմ կատարելու կասկածանքով երեկ ձերբակալել է Իսրայելի քաղաքացու (27 տարեկան)
ԶԼՄ–ները հայտնում են, որ տղամարդը խոստովանել է մեղքը և զղջացել։ Սակայն ոստիկանությունը դիմել է Երուսաղեմի դատարան` պահանջելով երկարաձգել ձերբակալության ժամկետը։
Հիշեցնենք` 2023 թ. հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Դրանից հետո պաղեստինյան ՀԱՄԱՍ շարժման գրոհայինները ներխուժեցին սահմանամերձ շրջաններ՝ կրակ բացելով զինվորականների և քաղաքացիական անձանց վրա։ Նրանք պատանդ վերցրին ավելի քան 200 անձանց: Իշխանությունների տվյալներով՝ իսրայելական կողմից այդ ժամանակ զոհվեց մոտ 1,2 հազար մարդ։
Իսրայելի պաշտպանության բանակն ի պատասխան սկսեց «Երկաթե թրեր» գործողությունը և հայտարարեց Գազայի հատվածի ամբողջական շրջափակման մասին. դադարեցվեցին ջրի, էլեկտրականության, վառելիքի, սննդամթերքի և դեղորայքի մատակարարումները: