ԵՐԵՎԱՆ, 7 օգոստոսի – Sputnik. Շենգավիթ վարչական շրջանի նախկին ղեկավար Ռազմիկ Մկրտչյանի խափանման միջոցը փոխվել է։ Նրա պաշտպան Հրանտ Դադոյանն իր ֆեյսբուքյան էջում հայտնում է, որ դատարանը՝ Ջոն Հայրապետյանի նախագահությամբ, մասնակիորեն բավարարել է քննիչի միջնորդությունը կալանքի երկարաձգման վերաբերյալ և որպես խափանման միջոց կիրառել է տնային կալանքը։
«Պաշտպանական կողմը հատուկ ընդգծում է, որ առաջադրված մեղադրանքը չի համապատասխանում Մկրտչյանի իրական գործողություններին։ Առաջիկայում, օրենքով սահմանված կարգով, հայտնի կլինեն փաստեր, որոնք կբացահայտեն դեպքի իրական դրդապատճառներն ու շահագրգիռ անձի հետապնդած վարքագիծը»,- գրել է պաշտպանը։
Հունիսի 15-ին հայտնի դարձավ, որ կալանավորվել է Երևանի Շենգավիթ վարչական շրջանի նախկին ղեկավար Ռազմիկ Մկրտչյանը։
Նախնական տեղեկություններով` Մկրտչյանը ձերբակալվել է թաղապետարանի աշխատակիցներից մեկին ծեծելու համար։
Հունիսի 10-ին նա հայտարարել էր իր լիազորությունները դադարեցնելու մասին շեշտելով, որ աշխատանքային պարտականությունները դադարեցնելու որոշումն անձամբ է կայացրել՝ պայմանավորված անձնական հանգամանքներով։
Նշենք, որ Ռազմիկ Մկրտչյանը վարչական շրջանի ղեկավարի պաշտոնում նշանակվել էր 2018 թվականին՝ 26 տարեկանում։