ԵՐԵՎԱՆ, 4 օգոստոսի – Sputnik. Օգոստոսի 6-ից գիշերային ժամերին (ժ.00.00-ից մինչև 06.00) Դիլիջանի թունելով երթևեկությունը փակ է լինելու բոլոր տրանսպորտային միջոցների համար։ Տեղեկությունը հայտնում է Ճանապարհային դեպարտամենտի մամուլի ծառայությունը։
«Գիշերային ժամերին մինչև 7 տոննա թույլատրելի առավելագույն զանգված ունեցող ավտոմոբիլները Դիլիջանի թունելը կարող են շրջանցել Սեմյոնովկա բնակավայրով։ 7 տոննայից ավելի և կցորդիչով տրանսպորտային միջոցների համար տվյալ ճանապարհը գիշերային ժամերին փակ է լինելու»,–ասվում է հաղորդագրության մեջ։
Նշվում է, որ սահմանափակումների պատճառը թունելի երթևեկելի մասում իրականացվելիք միջին նորոգման աշխատանքներն են։
Ցերեկային ժամերին երթևեկությունը թունելով բաց կլինի։ Գիշերային ժամերին սահմանափակումների վերացման վերաբերյալ կհաղորդվի լրացուցիչ։