ԵՐԵՎԱՆ, 3 օգոստոսի — Sputnik. Սիրիայի հետ Թուրքիայի պատրաստվող ռազմական համաձայնագրի և այնտեղ բազաներ ստեղծելու մասին տեղեկություն չկա: Այս մասին ՌԻԱ Նովոստիին հայտնել ենԹուրքիայի նախագահի աշխատակազմից։
Թուրքական ԶԼՄ-ները հայտնել են, որ Անկարան և Դամասկոսը մինչև օգոստոսի վերջ ռազմական համագործակցության մասին համաձայնագիր կստորագրեն, որը նախատեսում է Թուրքիայի օգնությունը բանակի ձևավորման և անձնակազմի պատրաստման գործում: ԶԼՄ-ների տվյալներով՝ Թուրքիան ծրագրում է Սիրիայի տարածքում երեք ռազմաբազա տեղակայել։
«Մենք նման տեղեկություն չունենք», - հայտնել են Թուրքիայի վարչակազմից:
Ավելի վաղ հայտնի էր դարձել, որ Սիրիան պաշտոնապես Թուրքիայից օգնություն է խնդրել «պաշտպանական ներուժի ամրապնդման և ահաբեկիչների դեմ պայքարի» համար:
Հիշեցնենք, որ հուլիսի 13-ին հայտնի էր դարձել սիրիական զինված խմբավորումների հարձակման մասին Էս-Սուվեյդա նահանգի դրուզյան (էթնիկ խմբեր, որոնց աջակցում է Իսրայելի կառավարությունը՝ խմբ.) մի շարք բնակավայրերի վրա, ինչի հետևանքով փակվել էր նաև նահանգը Դամասկոսին կապող մայրուղին: Խաղաղ բնակչությանը պաշտպանելու համար զինված ավազակախմբերի հետ կռվի մեջ էին մտել դրուզների ինքնապաշտպանական ջոկատները։
Դրուզներին աջակցելու նպատակով Իսրայելի պաշտպանության բանակը հուլիսի 16-ին հարված է հասցրել Դամասկոսում Սիրիայի գլխավոր շտաբի մուտքի դարպասին: Սիրիայի հետ հարաբերությունների սրման ֆոնին ՑԱԽԱԼ-ը նաև հայտարարել է Գոլանի բարձունքներ երկու դիվիզիա տեղափոխելու պատրաստակամության մասին:
Հուլիսի 19-ին Թուրքիայում ԱՄՆ դեսպան և Սիրիայի հարցով ԱՄՆ հատուկ բանագնաց Թոմ Բարաքը հայտնել է, որ Իսրայելի վարչապետ Բենյամին Նեթանյահուն և Սիրիայի անցումային շրջանի նախագահ Ահմեդ աշ Շարաան համաձայնել են հրադադար հաստատել: Դրանից հետո Սիրիայի անցումային շրջանի նախագահ Ահմեդ Ալ-Շարաան հայտարարել է երկրում համապարփակ հրադադարի մասին։ Իշխանությունները նախազգուշացրել են, որ հրադադարի խախտումը կհամարվի երկրի ինքնիշխանության խախտում և իրավական միջոցների կհանգեցնի: