ԵՐԵՎԱՆ, 29 հուլիսի -Sputnik. Բելառուսի պաշտպանության նախարարությունը հայտնել է, որ ՀՕՊ հերթապահ ուժերը կանխել են անհայտ անօդաչուի թռիչքը, Մինսկում դրա անկման հետևանքով ոչ ոք չի տուժել։
«Հուլիսի 29-ին, գիշերվա ժամը 2-ի սահմաններում (Մոսկվայի ժամանակով - խմբ.) ՀՕՊ հերթապահ ուժերը Բելառուսի Հանրապետության օդային տարածքում հայտնաբերել և կանխել են անհայտ օբյեկտի թռիչքը. օդային տարածքի օգտագործման կանոնների խախտողը նույնականացվել է որպես անօդաչու։ Ռադիոէլեկտրոնային պայքարի միջոցների կիրառման հետևանքով ժամը 02:33-ին անօդաչուն ընկել է Մինսկ քաղաքի Մատուսևիչի փողոցի 72-րդ տան մոտակայքում»,- ասվում է նախարարության Telegram–ալիքում հրապարակված հաղորդագրության մեջ։
Ընդգծվում է, որ տուժածներ չկան։ Հաշվի առնելով այս միջադեպը՝ անհապաղ լրացուցիչ միջոցառումներ են ձեռնարկվում օդային տարածքի օգտագործման նկատմամբ վերահսկողությունը ուժեղացնելու համար։
Բելառուսի ՊՆ–ն հավելել է, որ միջադեպի վերաբերյալ ստուգումներ են իրականացվում։
Նշվում է, որ «պետության ղեկավարն անձամբ է վերահսկում իրավիճակը»։