ԵՐԵՎԱՆ, 28 հուլիսի – Sputnik. Վրաստան մուտք գործող օտարերկրյա քաղաքացիների և քաղաքացիություն չունեցող անձանց համար ժամանակավոր տեղակայման վայր կկառուցվի «Դարիալի» անցակետում: Այս մասին հայտնում է Sputnik Գրուզիան։
Նշվում է, որ նախագծի մոտավոր արժեքը 300 հազար լարի է (111 հազար դոլար):
Տեղակայման վայրը կառուցվելու է «Միջազգային պաշտպանության մասին» նոր օրենքի համաձայն, որն ուժի մեջ կմտնի հոկտեմբերի 1-ից։
Փաստաթղթի համաձայն՝ օտարերկրացին կամ քաղաքացիություն չունեցող անձն իրավունք կունենա միջազգային պաշտպանություն տրամադրելու միջնորդություն ներկայացնել Վրաստանի սահմանին կամ տարանցիկ գոտում, իսկ միջնորդությունը կդիտարկվի անմիջապես սահմանային կետում՝ առանց անձին երկիր մուտք գործելու թույլտվություն տրամադրելու:
Վրաստանի ՆԳՆ-ն նախագծի հիմնավորման մեջ նշում է, որ վերջին շրջանում ավելացել է այն անձանց թիվը, որոնք փորձում են Ռուսաստանից անվավեր փաստաթղթերով հատել Վրաստանի սահմանը: