ԵՐԵՎԱՆ, 28 հուլիսի – Sputnik․ Երևանի Ալեքսանդր Պուշկինի անվան դպրոցի մի խումբ աշակերտների ծնողներ բողոքի ակցիա են անում քաղաքապետարանի շենքի մոտ։ Նրանք պահանջում են տնօրենի ժամանակավոր պաշտոնակատարի պաշտոնում թողնել Զառա Բարսեղյանին։
Նշենք, որ Երևանի Պուշկինի անվան թիվ 8 հիմնական դպրոցի աշակերտները մայիսի 8–ին դասադուլ էին անում` պահանջելով չեղարկել դպրոցի տնօրեն Նատալյա Ստեփանյանին աշխատանքից ազատելու որոշումը, աշակերտների ծնողներն էլ ստորագրահավաք էին կազմակերպել։ Միաժամանակ ՀՀ ԿԳՄՍՆ–ից Sputnik Արմենիային հայտնել էին, որ Ստեփանյանը չի անցել ատեստավորման հարցազրույցի փուլը և սկսել է դրա արդյունքների բողոքարկման գործընթացը։ Ավելի ուշ հայտնի դարձավ, որ Ստեփանյանի դիմում–բողոքը չի բավարարվել:
Ծնողներն ու անձնակազմը պահանջեցին, որ տնօրենի ժամանակավոր պաշտոնակատար նշանակվի դպրոցի անձնակազմից մեկը, ինչը և արվեց․ պաշտոնում նշանակվեց ուսումնական գծով փոխտնօրեն Զառա Բարսեղյանը։ Օրերս հայտնի է դարձել, որ Երևանի Ալեքսանդր Բլոկի անվան թիվ 122 դպրոցի տնօրեն Կարինե Մխիթարյանն իր դիմումի համաձայն ազատվել է պաշտոնից և նշանակվել Պուշկինի դպրոցում տնօրենի ժամանակավոր պաշտոնակատար։
Ծնողներն ասում են՝ եթե իրենց պահանջը չբավարարվի և տնօրենի ժամանակավոր պաշտոնակատարի պաշտոնում չմնա Զառա Բարսեղյանը, ապա սեպտեմբերի 1-ից դասադուլ են անելու։