ԵՐԵՎԱՆ, 19 հուլիսի - Sputnik. Ավարտվեց «Ոսկե ծիրան» 22-րդ միջազգային կինոփառատոնը: Ժյուրին հրապարակեց մրցանակակիրների անունները։
Եվ այսպես`
լիամետրաժ ֆիլմերի միջազգային մրցույթում «Ոսկե ծիրան» ստացավ Իգոր Բեզինովիչի «Ֆիումե կամ մա՛հ» ֆիլմը։ «Արծաթե ծիրանի» արժանացավ Տատո Կոթեթիշվիլիի «Սուրբ էլեկտրականություն» կինոնկարը: Հատուկ հիշատակման արժանացավ Օլհա Ժուրբայի «Դանդաղ այրվող հողի երգեր» ֆիլմը։
Տարածաշրջանային մրցույթ անվանակարգում «Ոսկե ծիրան» մրցանակը ստացավ Սեպիդե Ֆարսիի «Սիրտդ ձեռքդ առ ու քայլիր» ֆիլմը, «Արծաթե ծիրանի» արժանացավ Սայիդ Նուրին` «Թեհրան. Անավարտ պատմություն» ֆիլմի համար, հատուկ հիշատակման արժանացավ Զարդաշտ Ահմեդը` «Տիգրիս գետի առյուծները» ֆիլմի համար։
«Ծիրանի կորիզ» կարճամետրաժ ֆիլմեր անվանակարգում «Ոսկե ծիրանը» ստացավ Գոռ Առուշանյանի «Մայրենիք» ֆիլմը, «Արծաթե ծիրանը» ստացավ Զակ Դեմիրճյանը` «Oձի ապուր» ֆիլմի համար, իսկ Արեգ Ազատյանը «Աշխարհը մերն ա» ֆիլմի համար արժանացավ հատուկ հիշատակման։
FIPRESCI-ի մրցանակ ստացավ Մորադ Մոստաֆայի «Այշան չի կարող թռչել հեռանալ» ֆիլմը։
Ինչ վերաբերում է «Փարաջանովի Թալեր» հատուկ մրցանակին, այն այս տարի ստացավ Կաննի կինոփառատոնի և Սեզարի մրցանակակիր, մավրիտանացի վարպետ Աբդեռահման Սիսակոն` «Բամակո» ֆիլմի համար։ Ֆիլմն այս տարի մրցութային չէր, այն ներկայացված է եղել հետահայաց ցուցադրությունների շրջանակում։
Այս տարվա «Ոսկե ծիրանի» ժամանակ ցուցադրվել են նաև Սիսակոյի «Տիմբուկտու» և «Սևթեյ» ֆիլմերը, ինչպես նաև Ամիր Նադերիի «Շրթհարմոնը», «Վազորդը» և «Սպասում» ֆիլմերը։
Փառատոնի մեկ այլ հատուկ մրցանակը` «Վարպետը», հանձնվեց նշանավոր «Աթենբերգ» ֆիլմի ռեժիսոր, փառատոնի ժյուրիի անդամ, ազգությամբ հույն Աթինա Ռախիլ Ցանգարիին։
Կինոփառատոնի հանդիսավոր փակումն ազդարարվեց «Ոսկե ծիրան» կինոփառատոնի հիմնադիր և նախագահ Հարություն Խաչատրյանի «Վերջին կայարանը» ֆիլմով։ Նրան նույնպես հանձնվեց «Փարաջանովի թալեր» մրցանակ։