ԵՐԵՎԱՆ, 17 հուլիսի – Sputnik․ Հայաստանը թևակոխել է երկրի ստրատեգիական կողմնորոշումը փոխելու ավարտական փուլ։ Sputnik Արմենիայի մուլտիմեդիոն մամուլի կենտրոնում այս մասին ասաց քաղաքական վերլուծաբան, «Դեմոկրատական այլընտրանք» կուսակցության նախագահ Սուրեն Սուրենյանցը՝ մեկնաբանելով Փաշինյանի երեկվա ասուլիսը։
«Այն, ինչ մենք տեսնում ենք, արդեն իմպլեմենտացիան է, ոչ թե փորձը։ Մենք ավարտական փուլում ենք»,- ասաց Սուրենյանցը։
Նրա կարծիքով՝ Հայաստանը դառնալու է աշխարհաքաղաքական բախումների կիզակետ։
Կարծում է, որ ասուլիսի ընթացքում Փաշինյանը ևս մեկ անգամ անոնսավորեց իր տոտալիտար կառավարման մասին։ Սուրենյանցի խոսքով՝ դա արվում է ոչ միայն 2026 թվականի խորհրդարանական ընտրություններին ընդառաջ, այլ որ Ալիևին և Էրդողանին ցույց տա, թե իրավիճակն իր լիարժեք վերահսկողության ներքո է։
«Այն, ինչ ինքը պայմանավորվում է Ալիևի կամ Էրդողանի հետ, ասում են՝ տղա ջան, մենք քեզ չենք վստահում, որովհետև արդյոք դու ունակ ես դրանք ռեալիզացնելու։ Նա փորձում է այս ամենով ցույց տալ, որ ամեն ինչ վերահսկում է»,- կարծում է քաղաքական վերլուծաբանը։
Հիշեցնենք` ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիևի վերջին հանդիպումը տեղի է ունեցել հուլիսի 11-ին Աբու Դաբիում և տևել է ավելի քան 5 ժամ։ Հանդիպումը սկսվել է ընդլայնված կազմով, ապա առաջնորդները շարունակել են առանձնազրույցը: Կես ժամ տևած ընդմիջումից հետո հանդիպումը կրկին շարունակվել է պատվիրակությունների կազմով, որոշ ժամանակ անց բանակցությունները շարունակվել են առանձնազրույցի ձևաչափով: Ըստ ՀՀ ԱԳՆ–ի հաղորդագրության` Փաշինյանն ու Ալիևը քննարկել են Հայաստան-Ադրբեջան միջպետական հարաբերությունների կարգավորման օրակարգի տարբեր ասպեկտներ: Հայկական կողմը հաջողված է համարում հանդիպումը։