ԵՐԵՎԱՆ, 15 հուլիսի - Sputnik. Այսօր առավոտյան Դոհուկ նահանգի (Իրաքյան Քրդստան) Սարսանգի նավթային հանքավայրում պայթյուն է տեղի ունեցել, որը հրդեհի պատճառ է դարձել։
Տուժածներ չկան, հայտնում է Rudaw հեռուստաալիքը՝ հղում անելով հանքավայրի օպերատոր ամերիկյան HKN Energy ընկերությանը։
Ընկերության տվյալներով՝ հրդեհը բռնկվել է ժամը 7:00-ի սահմաններում։ Հրդեհը շարունակվում է, վթարային ծառայությունները աշխատում են։
Հանքավայրի աշխատակիցները հայտնել են, որ պայթյունը կարող էր առաջացած լինել անօդաչուի հարվածի հետևանքով։
Միջադեպը տեղի է ունեցել տարածաշրջանում նավթային օբյեկտների վրա մի շարք հարձակումների ֆոնին։ Հետաքննություն է ընթանում, վնասված վայրում աշխատանքները ժամանակավորապես դադարեցվել են։
Նախօրեին երեկոյան պայթուցիկներով լի երկու անօդաչուներ ընկել են մեկ այլ հանքավայրի՝ Խուրմալայի տարածքում։ Ջրի պոմպեր են վնասվել։ Հարվածների համար դեռ որևէ մեկը պատասխանատվություն չի ստանձնել։ Իշխանությունները հետաքննություն են սկսել նավթային ենթակառուցվածքների վրա հաճախակի դարձած հարձակումների վերաբերյալ։