ԵՐԵՎԱՆ, 15 հուլիսի – Sputnik. Ռուսաստանը շարունակում է պատրաստ լինել Ուկրաինայի հետ ուղիղ բանակցությունների երրորդ փուլին, բայց Կիևը դեռ որևէ առաջարկ չի արել այդ բանակցությունների ժամկետի վերաբերյալ։ Այս հայտարարել է ՌԴ նախագահի մամուլի քարտուղար Դմիտրի Պեսկովը։
«Մենք բազմիցս հայտարարել ենք, որ սպասում ենք ուկրաինական կողմից ուղիղ բանակցությունների երրորդ փուլի ժամկետի վերաբերյալ առաջարկների։ Մենք շարունակում ենք պատրաստ լինել, սակայն Կիևից որևէ առաջարկ այդպես էլ չենք ստացել», – լրագրողներին ասել է նա։
Մեկնաբանելով միջազգային խաղացողների ընդհանուր տրամադրությունը՝ Պեսկովը կասկած է հայտնել Եվրոպայի` խաղաղության ձգտելու անկեղծ ցանկության վերաբերյալ։
«Ե՛վ Վաշինգտոնը, և՛ Եվրոպան իբր ցանկանում են Ռուսաստանի և Ուկրաինայի միջև երկխոսություն տեսնել։ Սակայն դատելով հայտարարություններից` Եվրոպան ավելի շատ հետաքրքրված է ռազմական գործողությունների սրմամբ, քան խաղաղ ռեժիմի անցմամբ», – նշել է նա։
Պեսկովը մեկնաբանել է նաև ԱՄՆ նախագահ Դոնալդ Թրամփի և Վլադիմիր Զելենսկու զրույցի ենթադրյալ բովանդակության մասին հաղորդագրությունները։ Ավելի վաղ «Washington Post»-ը հայտնել էր, որ Թրամփը Զելենսկիին կոչ է արել ուժեղացնել ճնշումը Մոսկվայի և Սանկտ Պետերբուրգի նկատմամբ, իսկ Զելենսկին ի պատասխան հեռահար զենք է պահանջել։
Կրեմի մամուլի քարտուղարի խոսքով` նման հաղորդագրությունները հաճախ կեղծ են լինում, նույնիսկ հեղինակավոր լրատվամիջոցներում, բայց երբեմն էլ լուրջ արտահոսքեր են լինում։