Երևանի Ազատության հրապարակում մեկնարկեց արցախցիների հանրահավաքը

Երևանի Ազատության հրապարակում «Զարթի՛ր, լաօ» երգով մեկնարկեց Արցախցիների իրավունքների պաշտպանության խորհրդի հրավիրած հանրահավաքը։ Հավաքի մասնակիցները պարզեցին Արցախի մոտ 50 մետրանոց դրոշը։

Հանրահավաքի ընթացքում բարձրաձայնվելու են արցախցիների սոցիալական հարցերը, մասնավորապես բնակապահովման ծրագրի մասով, Բաքվում գտնվող հայ գերիների վերադարձի հարցը, ինչպես նաև Արցախում գտնվող պատմամշակութային ժառանգության հարցը։

Նշենք, որ նախորդ նմանատիպ հանրահավաքը Ազատության հրապարակում տեղի էր ունեցել մարտի 29-ին:

ՀՀ ներքին գործերի նախարարության միգրացիայի և քաղաքացիության ծառայության տվյալներով՝ 2023 թվականի սեպտեմբերից հետո Արցախից 115 365 մարդ է բռնի տեղահանվել։

Հուլիսի 3-ի տվյալներով՝ նրանցից 9 346-ը Հայաստանի Հանրապետության քաղաքացիություն է ստացել։