ԵՐԵՎԱՆ, 12 հուլիսի – Sputnik. Երեկ 3 ամսով կալանավորված և Աբովյանի քրեակատարաղական հիմնարկ տեղափոխված Լիանա Հարությունյանի մոտ են տարել նրա 8 ամսական երեխային, իսկ մյուս երկու անչափահաս երեխաները հայրիկի խնամքի տակ են։ Այս մասին Sputnik Արմենիայի հետ զրույցում հայտնեց ԱԺ «Հայաստան» խմբակցության պատգամավոր Էլինար Վարդանյանը։
Երեկ հայտնի դարձավ, որ Երևանի ընդհանուր իրավասության դատարանը՝ դատավոր Արշակ Մաթևոսյանի նախագահությամբ, դատարանի դահլիճում փոխել է անօրինական միգրացիային օժանդակելու մեջ մեղադրվող՝ 8 ամսական երեխայի մոր խափանման միջոցը ու 3 ամսով կալանավորելու որոշում կայացրել։
«Փաստաբանը քիչ առաջ է դատարանից կարողացել է ստանալ որոշումը և առաջիկայում բողոքարկման պրոցեսն է լինելու։ «Հայաստան» խմբակցության կին պատգամավորները պատրաստակամություն են հայտնել անձնական երաշխավորություն ներկայացնել , որպեսզի Լիաննա Հարությունյանի խափանման միջոցը փոփոխվի»,–ասաց Վարդանյանը։
Նա ընդգծեց, որ Լիաննայի ընտանիքն ապրում է վարձակալած տանը։ Տանտերը չի համաձայնել, որ իր տունը ծառայի տնային կալանքի համար։
Հավելենք, որ «Հայաստան» խմբակցության պատգամավորները պատրաստակամություն են հայտնել անձնական երաշխավորություն ներկայացնել , որպեսզի Լիաննա Հարությունյանի խափանման միջոցը փոփոխվի։
Այսօր` ավելի վաղ, ՀՀ մարդու իրավունքների պաշտպան Անահիտ Մանասյանն անդրադարձել էր մանկահասակ երեխաների մորը կալանավորելու դեպքին և նշել, որ արդեն իսկ ձեռնարկվել և ձեռնարկվում են համապատասխան քայլեր երեխայի խնամքի տրամադրման հարցի առնչությամբ: