Հայաստանը կարող էր դառնալ օպերային երգիչներ արտահանող կայսրություն, եթե ունենար մշակութային պետական ռազմավարություն։ Sputnik Արմենիայի եթերում ասաց օպերային երգչուհի, ՀՀ ժողովրդական արտիստ Հասմիկ Պապյանը։
«Մեծ երջանկություն է տեսնել երիտասարդ տաղանդներին, որոնք գալիս են մեզ փոխարինելու։ Դա մի ուրիշ վայելք է։ Ինձ համար ֆենոմեն է, չեմ կարողանում հասկանալ , թե հատկապես մարզերում որտեղից են հայտնվում այդքան տաղանդավոր տղաներ, որոնք զբաղվում են դասական երաժշտությամբ»,–ասաց Պապյանը։
Վստահ է, այն աշխատանքը, որ իրենք թավջութակահար, Հայաստանի վաստակավոր արտիստ Նարեկ Հախնազարյանի հետ անում են` հենց դա՛ է հայրենասիրությունը։
Պապյանը նաև տեղեկացրեց, որ հենց այդ տաղանդավոր երիտասարդների մասնակցությամբ էլ Կոմիտասի անվան կոնսերվատորիայի օպերային ստուդիայում տեղի կունենա Ջոակինո Ռոսսինիի «Սևիլյան սափրիչ» օպերային ներկայացումը, որին կմասնակցի «Արցախ» նվագախումբը, դիրիժոր՝ ՀՀ վաստակավոր արտիստ Նարեկ Հախնազարյանի ղեկավարությամբ։
Ներկայացումները՝ հուլիսի 7-ին, 8-ին, 10-ին, 11-ին, ժամը 19:00-ին։
Հարցազրույցն ամբողջությամբ՝ տեսանյութում։