ԵՐԵՎԱՆ, 9 հուլիսի - Sputnik. ԱԺ «Հայաստան» խմբակցության պատգամավոր Արթուր Սարգսյանի խափանման միջոցը կալանքն ընտրելու միջնորդության քննությունը տեղի կունենա հուլիսի 9-ին, ժամը 11։00-ին։
Միջնորդությունը քննելու է դատավոր Արտակ Կարապետյանը Ավան -Նոր Նորք վարչական շրջանների ընդհանուր իրավասության դատարանում («Մասիվի» դատարան, Գլուլիքևխվյան 20)։
Հայտնել էինք, որ ՀՀ Ազգային ժողովը բավարարել է գլխավոր դատախազի միջնորդագիրը՝ համաձայնություն տալով «Հայաստան» խմբակցության անդամ Արթուր Սարգսյանին ազատությունից զրկելու համար։ Ավելի վաղ պատգամավորները քվեարկությամբ բավարարել էին գլխավոր դատախազի միջնորդությունը՝ Սարգսյանին պատգամավորական անձեռնմխելիությունից զրկելու և նրա նկատմամբ հանրային քրեական հետապնդում հարուցելու համար։
Նշենք, որ մինչ ԱԺ-ն քննում էր Սարգսյանին ազատությունից զրկելու միջնորդությանը համաձայնության տալու հարցը, Արթուր Սարգսյանն իր կամքով Քննչական կոմիտեի մոտ էր եկել՝ վստահությամբ, որ կալանավորման որոշումն արդեն վաղուց կա։
Արթուր Սարգսյանին մեղսագրվում են ՀՀ քրեական օրենսգրքի 43-308 հոդվածի (ահաբեկչության նախապատրաստում) 1-ին մասով և 43-419 հոդվածի (իշխանության զավթման նախապատրաստում) 1-ին մասով գործողություններ։
Սարգսյանի նկատմամբ հանրային քրեական հետապնդում նախաձեռնելու միջնորդությունը «Սրբազան պայքար» շարժման ղեկավարների և մասնակիցների կողմից ահաբեկչության և իշխանությունը յուրացնելու նախապատրաստություն կատարելու վերաբերյալ քրեական վարույթի շրջանակում է։