ԲԴԽ նախկին նախագահ Ռուբեն Վարդազարյանը չի հավատում, որ դատավորները հավաքվել են ու քննարկել Վեհափառին կալանավորելու կամ չկալանավորելու հարցը. Sputnik Արմենիային ասել է Վարդազարյանը։
«Նույնիսկ ամենավերջին սրիկան, որը հոգեբանորեն պատրաստ է Վեհափառին կալանավորել, ահ ու սարսափով սպասում է, երազում է, որ իրեն այդ գործը չմակագրվի»,– նշում է Վարդազարյանը` մեկնաբանելով մամուլում հայտնված տեղեկությունները։
Դրանց համաձայն` սրբազանների կալանքից հետո դատավորների մի խումբ հավաքվել է՝ քննարկելու, թե երկրում ինչ է կատարվում:
«Հրապարակ»–ը գրել էր, թե նրանցից մեկը հարց է բարձրացրել` եթե Վեհափառին կալանքի «բերեն», ի՞նչ են անելու: Նորանշանակ երիտասարդ դատավորները, իբր, արդարացել են` թե ստիպված են լինելու բավարարել իշխանությունների պահանջը։ Մինչդեռ փորձառու դատավորները ջահելներին պարսավել են, թե՝ Եկեղեցու վրա արշավը շարունակելով ու հոգևորականներին կալանավորելով` այդ մեղքից սերունդներով չեն մաքրվի։