ԵՐԵՎԱՆ, 7 հուլիսի – Sputnik. Ռուսաստանը պատրաստ է Իրանին տրամադրել իր տեխնոլոգիական ծառայությունները՝ Թեհրանի տրամադրության տակ գտնվող հարստացված ուրանը աղքատացնելու համար։ Այս մասին հայտարարել է ՌԴ ԱԳ նախարար Սերգեյ Լավրովը՝ ամփոփելով Ռիո դե Ժանեյրոյում ԲՐԻԿՍ-ի գագաթնաժողովի արդյունքները։
ՌԴ ԱԳ նախարարի խոսքով՝ Իրանի միջուկային ծրագրի վերաբերյալ Գործողությունների համապարփակ ծրագիրը հաշվի էր առնում ուրանի աղքատացման հետ կապված ծառայություններ մատուցելու Ռուսաստանի հնարավորությունները, իսկ Իրանի Իսլամական Հանրապետությունում բավականաչափ ուրան է կուտակվել ատոմակայանի էներգետիկ նպատակների համար:
«Երբ ԱՄՆ-ն միակողմանիորեն դուրս եկավ այս համատեղ համապարփակ ծրագրից, Իրանը հարստացումը սահմանափակել պարտավորություն չուներ։ Մենք պարզապես հիշեցնում ենք, որ մենք նման տեխնոլոգիական հնարավորություններ ունենք և պատրաստ ենք դրանք տրամադրել՝ չափազանց հարստացված ուրանի ավելցուկը տանելով Ռուսաստան՝ վերամշակման, և էներգետիկորեն հարստացված ուրանը վերադարձնելով Իրանի Իսլամական Հանրապետություն՝ նրա միջուկային էներգետիկայի օբյեկտներին»,-նշել է Լավրովը։
ՌԴ արտգործնախարարն ընդգծել է` Ռուսաստանը չի վարանի, եթե Իրանը ցանկություն հայտնի օգնություն ստանալ կողմերի դիրքորոշումների մերձեցման հարցում։
Նա նաև հիշեցրել է, որ Գործողությունների համատեղ համապարփակ ծրագիրը, որի համար համաշխարհային հանրությունը շնորհակալություն էր հայտնում բոլոր մասնակիցներին և որը հետո չեղարկվեց, մշակվել է այդ թվում եվրոպացիների, ամերիկացիների, Ռուսաստանի և Չինաստանի մասնակցությամբ: