ԵՐԵՎԱՆ, 3 հուլիսի - Sputnik. Բաքվում Sputnik Ադրբեջանի գործունեության շարունակման համար պայմաններ չկան, ՌԻԱ Նովոստիին հայտնել է «Ռոսիա սեգոդնյա» մեդիախմբի գլխավոր տնօրեն Դմիտրի Կիսելյովը։
«Ցավով ստիպված ենք արձանագրել, որ այսօր այդ երկրում Sputnik Ադրբեջանի գործունեության շարունակման համար պայմաններ չկան», - ասել է Կիսելյովը։
Ադրբեջանի ՆԳՆ-ն հունիսի 30-ին հայտարարել է Բաքվում Sputnik Ադրբեջանի գրասենյակում «հատուկ գործողություն» իրականացնելու մասին: Մոսկվայի Sputnik գործակալությունից ՌԻԱ Նովոստիին հայտնել են, որ խմբագրության հետ կապ չկա։ Գործակալության շենքի մոտ կանգնած են եղել Ադրբեջանի ՆԳՆ պարեկապահակային ծառայության մեքենաներ, ինչպես նաև մգեցված ապակիներով սև միկրոավտոբուսներ։
Ավելի ուշ Sputnik գործակալությունը հայտնել է, որ Բաքվում ուժայիններն անհեթեթ մեղադրանքներով ձերբակալել են երկու ռուս լրագրողների՝ Sputnik Ադրբեջանի խմբագրության ղեկավար Իգոր Կարտավիխին և գլխավոր խմբագիր Եվգենի Բելոուսովին, ապա կալանավորել 4 ամսով։ Գործակալությունում ճշտել են, որ ըստ տեղական ԶԼՄ-ների՝ աշխատակիցներին անհեթեթ մեղադրանքներ են առաջադրվել այն բանում, թե նրանք իբր «ԱԴԾ գործակալներ են»:
Հունիսի 30-ին ՌԻԱ Նովոստին հայտնել է նաև Ruptly-ի աշխատակցուհու՝ խմբագրի ձերբակալության մասին, որը մասնավոր այցով գտնվում էր Ադրբեջանում:
Փետրվարին Ադրբեջանի ԱԳՆ-ն հայտարարել էր հանրապետությունում Sputnik գործակալության աշխատանքը դադարեցնելու մտադրության մասին։ Sputnik-ի խմբագրությունում հայտնել են, որ Ադրբեջանում աշխատանքի ոչ մի պաշտոնական արգելք չի եղել, հնարավոր տարաձայնությունների կարգավորման թեմայով այդ ընթացքում երկու երկրների ԱԳՆ աշխատանքային խմբերի կառուցողական երկխոսություն է ընթացել։