Հայաստանյան շուկայում վերջին շրջանում հավկիթի զգալի էժանացում է նկատվում։ Որոշ խանութներում հավկիթը վաճառվում է նույնիսկ 20-ից 30 դրամով։ Ձվի շուկայում գնանկումն արձանագրել է նաև վիճակագրական կոմիտեն, որի համաձայն` մայիսին հավկիթը էժանացել է 4.3 տոկոսով։ Այս ֆոնին, դեռ ամիսներ առաջ որոշ լրատվամիջոցներ գրեցին, որ հայաստանյան խանութներում արհեստական հավկիթներ են վաճառվում։ Այս լուրերին հետևեց Սննդամթերքի անվտանգության տեսչական մարմնի հայտարարությունը, առ այն, որ Հայաստանի տարածքում արհեստական հավկիթների վաճառքի փաստեր չեն արձանագրվել, և, որ Հայաստանում գրանցված չէ արհեստական հավկիթներ արտադրող որևէ կազմակերպություն:
Ձվի շուկայում գնանկման և արհեստական հավկիթների մասին լուրերի առնչությամբ զրուցել ենք Թռչնաբույծների միության նախագահ Սերգեյ Ստեփանյանի հետ։
«Հայաստանում վերջին անգամ 4 տարի առաջ է ձու ներկրվել, ուր մնաց արհեստական ձվեր ներկրեն։ Ձուն այսօր վաճառվում է ինքնարժեքից ցածր գնով, քանի որ ձվի գերարտադրություն է»,-Sputnik Արմենիայի հետ զրույցում նշել է Սերգեյ Ստեփանյանը։