ԵՐԵՎԱՆ, 29 հունիսի - Sputnik. ԱՄՆ նոր վարչակազմը վերացնում է Հունգարիայում «Պակշ 2» ԱԷԿ-ի նախագծի հետ կապված պատժամիջոցները, և շինարարությունը այժմ կարող է շարունակվել, հայտարարել է Հունգարիայի արտաքին գործերի նախարար Պետեր Սիյարտոն։
«Բարեբախտաբար, հունվարից ի վեր Վաշինգտոնում Սպիտակ տանը կա նախագահ, որը Հունգարիային վերաբերվում է որպես ընկերոջ։ Հետևաբար, ԱՄՆ կառավարությունը վերացրել է Պակշի ԱԷԿ-ում ներդրումների հետ կապված պատժամիջոցները: Ռուսաստանում և Ֆրանսիայում շարունակվում է Պակշի ԱԷԿ-ի համար անհրաժեշտ խոշոր սարքավորումների արտադրությունը։ Պակշի շինհրապարակում շինարարությունը այժմ կարող է նոր թափ ստանալ», - Սիյարտոյի խոսքերն է մեջբերում MTI-ն։
Նախարարը նշել է, որ ԱՄՆ դեմոկրատական վարչակազմի կողմից 2024 թվականի նոյեմբերին կիրառված հակառուսական պատժամիջոցների արդյունքում Հունգարիայում Պակշի ԱԷԿ-ի ընդլայնման շարունակությունը «գրեթե անհնար էր դարձել»։
Հունգարիայի միակ «Պակշ» ատոմակայանը գտնվում է Բուդապեշտից 100 կմ և Պակշ քաղաքից 5 կմ հեռավորության վրա: Այժմ «Պակշ» ԱԷԿ-ում արտադրվում է Հունգարիայի ամբողջ էլեկտրաէներգիայի գրեթե կեսը, իսկ երկու նոր բլոկների շահագործման շնորհիվ այդ մասնաբաժինը կկրկնապատկվի: Հունգարիայի ղեկավարությունը բազմիցս հայտարարել է, որ ատոմային էներգիան երկրի էներգետիկ անվտանգությունն ապահովելու միջոց է։