ԵՐԵՎԱՆ, 28 հունիսի – Sputnik. Շիրակի թեմի առաջնորդ Միքայել արքեպիսկոպոս Աջապահյանին տեղափոխել են «Երևան–Կենտրոն» քրեակատարողական հիմնարկ, որը հանրությանը հայտնի է որպես «ԿԳԲ-ի պադվալ»։ Տեղեկությունը Sputnik Արմենիային հայտնեց փաստաբան Երեմ Սարգսյանը։
«Նախապես մտածում էինք, որ սրբազանին դատարանից տարել են «Նուբարաշեն» ՔԿՀ, սակայն մի քանի ժամ առաջ տեղեկացանք, որ տարել են ԱԱԾ մեկուսարան։ Այդտեղ մարդկանց տանում են առավել խիստ մեկուսացման պայմաններում պահելու համար, ու քանի որ Աջապահյանի հարցը վերածվել է կյանքի հարցի, դրա համար այնտեղ են տարել»,– ասաց փաստաբանը։
Նշենք, որ այս ՔԿՀ–ում են գտնվում նաև «Սրբազան պայքար» շարժման առաջնորդ Բագրատ սրբազանն ու գործարար Սամվել Կարապետյանը։
Հիշեցնենք` Շիրակի թեմի առաջնորդի նկատմամբ քրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։
ՀՀ ազգային անվտանգության ծառայության հատուկջոկատայինները հունիսի 27-ին մտան Մայր աթոռ Սուրբ Էջմիածին` տանելու Աջապահյանին, սակայն բախվեցին քաղաքացիների դիմադրությանը։ Ավելի ուշ ԱԱԾ-ն հայտարարեց, որ ելնելով անվտանգության նկատառումներից և կանխելով իրավիճակի հնարավոր ու դիտավորյալ սրումը` որոշվել է դուրս գալ Մայր աթոռի տարածքից։
Որոշ ժամանակ անց Աջապահյանն ինքը ներկայացավ ՀՀ քննչական կոմիտե և ձերբակալվեց։ Այս ընթացքում տասնյակ անձինք ձերբակալվեցին։ Քննչական կոմիտեն հայտնեց, որ քրեական վարույթ է նախաձեռնվել նաև Մայր աթոռ Սուրբ Էջմիածնի տարածք ԱԱԾ–ականների մուտքը խոչընդոտելու համար։
Դատարանն այսօր որոշեց 2 ամսով կալանավորել Շիրակի թեմի առաջնորդին։