ԵՐԵՎԱՆ, 28 հունիսի — Sputnik. Այն ամենը, ինչ կատարվում է այսօր եկեղեցականների դեմ, մաքուր քաղաքական հետապնդում է։ Այս մասին դատարանի մոտ լրագրողների հետ զրույցում ասաց փաստաբան Վարազդատ Հարությունյանը։
Նա ընդգծեց, որ միջին ծանրության հանցագործության համար, որով նախատեսվում են մի շարք այլընտրանքային խափանման տեսակներ, այսօր կիրառվում է կալանք։
«Եթե չեմ սխալվում, երկու տարվա վաղեմության ինչ-որ հարցազրույցի հիմքով Միքայել սրբազանի նկատմամբ քրեական հետապնդում հարուցելն ու խափանման միջոց կալանք ընտրելու միջնորդությունը ընդհանրապես չի տեղավորվում իրավական տրամաբանության ներքո։ Մենք ոչ քաղաքական գործերով այսպիսի դեպքերի չենք կարող ականատես լինել»,-ասաց Հարությունյանը։
Հիշեցնենք` Շիրակի թեմի առաջնորդի նկատմամբ քրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։
ՀՀ ազգային անվտանգության ծառայության հատուկջոկատայինները հունիսի 27-ին մտել էին Մայր աթոռ Սուրբ Էջմիածին` տանելու Աջապահյանին։ Ավելի ուշ ԱԱԾ-ն հայտարարեց, որ ելնելով անվտանգության նկատառումներից և կանխելով իրավիճակի հնարավոր և դիտավորյալ սրումը` որոշվել է դուրս գալ Մայր աթոռի տարածքից։
Որոշ ժամանակ անց Աջապահյանն ինքը ներկայացավ ՀՀ քննչական կոմիտե, նա ձերբակալված է, ու պետք է ավելի ուշ դատարանը որոշի նրա խափանման միջոց ընտրելու հարցը։ Այս ընթացքում տասնյակ անձինք ձերբակալվեցին։ Մայր աթոռ Սուրբ Էջմիածնի տարածք ԱԱԾ–ականների մուտքը խոչընդոտելու համար էլ Քննչական կոմիտեն քրեական վարույթ է նախաձեռնել։