ԵՐԵՎԱՆ, 17 հունիսի – Sputnik․ Ադրբեջանի տարածքից Իրանի ուղղությամբ իսրայելական ԱԹՍ-ների արձակման մասին հավաստի տեղեկություններ չկան։ Այսօր հրավիրված ասուլիսի ժամանակ այս մասին ասաց Հայաստանում Իրանի դեսպան Մեհդի Սոբհանին՝ պատասխանելով լրագրողներից մեկի հարցին։
Նրա խոսքով՝ Թեհրանն այդ մասին հավաստի տեղեկություններ չունի։
«Անհրաժեշտ են հաստատված փաստեր։ Սոցիալական ցանցերում հրապարակված տեսանյութերը՝ ինչպես Իրանի քաղաքացիների, այնպես էլ մյուսների, ապացույց չեն: Անհրաժեշտ են կոնկրետ գործողություններ և տվյալներ, որոնք կարող են հաստատել, որ շարադրվածը համապատասխանում է իրականությանը»,- ընդգծեց իրանցի դիվանագետը։
Ավելի վաղ սոցցանցերում տեսանյութ էր հայտնվել, որում պնդում էին, որ Իրանի վրա հարձակումներ են իրականացվում, այդ թվում՝ Ադրբեջանի տարածքից (օկուպացված Արցախից): Նման հայտարարություններ հնչեցրել են և՛ առանձին հասարակական գործիչներ, և՛ իշխանամետ ռեսուրսներ։
Հիշեցնենք` հունիսի 13-ին Իսրայելը լայնածավալ գործողություն է սկսել Իրանի դեմ՝ այդ երկրին մեղադրելով գաղտնի ռազմամիջուկային ծրագիր իրականացնելու մեջ, որն իբր մոտեցել է անդառնալիության կետին: Օդային ռմբակոծությունների և դիվերսիոն խմբերի թիրախներ են դարձել միջուկային օբյեկտները, զինված ուժերի հրամկազմը, միջուկային ֆիզիկոսները, ավիաբազաները, հակաօդային պաշտպանության միջոցները, «երկիր-երկիր» դասի հրթիռները:
Իրանը, որը հերքում է իր միջուկային ծրագրի ռազմական բաղադրիչը, պատասխանում է հրթիռային համազարկերով և հարվածային անօդաչու թռչող սարքերի արձակմամբ: Թեհրանում հարվածների թիրախ են նշում Իսրայելի ռազմական և ռազմարդյունաբերական օբյեկտները։ Երկու կողմից էլ աճում է բնակելի շինություններին ուղղված հարվածների և քաղաքացիական բնակչության շրջանում զոհերի թիվը։