ԵՐԵՎԱՆ, 13 հունիսի – Sputnik. Հայաստանը կողմ է քվեարկել ՄԱԿ-ի գլխավոր ասամբլեայի բանաձևին, որն անհապաղ հրադադար է պահանջում Գազայի հատվածում։ Տեղեկությունը հայտնում է կազմակերպության մամուլի ծառայությունը։
Բանաձևին աջակցել է 149 պետություն, 12-ը դեմ են քվեարկել, 19-ը՝ ձեռնպահ։ Բանաձևին դեմ արտահայտվածների թվում են ԱՄՆ-ն և Իսրայելը, որոնց միացել են Արգենտինան, Ֆիջին, Հունգարիան, Պարագվայը և այլ պետություններ։
Ձեռնպահ են մնացել Վրաստանը, Հնդկաստանը, Չեխիան, Էկվադորը, Եթովպիան և այլն։
Նշենք, որ գլխավոր ասամբլեայի բանաձևերը իրավաբանական պարտադիր ուժ չունեն, դրանք զգալի քաղաքական և բարոյական կշիռ ունեն։
Գլխավոր ասամբլեայի ղեկավար Ֆիլեմոն Յանգը հայտարարել է, որ 20 ամիս տևած պատերազմից հետո Գազայում տիրող սարսափը պետք է ավարտվի։ Նա Անվտանգության խորհրդին քննադատել է իր հիմնական պարտականությունը չկատարելու համար։
Յանգը նշել է, որ իրավիճակն անընդունելի է` խաղաղ բնակիչները զրկված են սննդից, ջրից և դեղորայքից, պատանդներ կան, նա ընդգծել է միջազգային անհապաղ գործողությունների անհրաժեշտությունը։
Հունիսի 4-ին ՄԱԿ-ի Անվտանգության խորհուրդը չկարողացավ ընդունել այն բանաձևը, որը պահանջում էր անհապաղ, անվերապահ և մշտական հրադադար Գազայում, ՀԱՄԱՍ-ի կողմից պահվող բոլոր պատանդների անհապաղ և անվերապահ ազատ արձակում, ինչպես նաև անկլավ մարդասիրական օգնություն ներմուծելու սահմանափակումների անհապաղ վերացում: ԱՄՆ–ն վետո էր դրել այդ փաստաթղթի վրա։ Անվտանգության խորհրդի մյուս 14 անդամներն աջակցել էին նրան։