ԵՐԵՎԱՆ, 10 հունիսի – Sputnik. ՌԴ նախագահ Վլադիմիր Պուտինը ակադեմիկոս Ալեքսանդր Չուբարյանին պետական մրցանակ է շնորհել՝ մարդասիրական գործունեության մեջ ձեռքբերումների համար։ Այս մասին հաղորդվում է ՌԴ նախագահի կայքում։
Դափնեկիրների անունները հատուկ ճեպազրույցի ժամանակ հայտարարել են նախագահի օգնական Անդրեյ Ֆուրսենկոն, նախագահի օգնական Վլադիմիր Մեդինսկին և նախագահի խորհրդական, քաղաքացիական հասարակության և մարդու իրավունքների զարգացման խորհրդի նախագահ Վալերի Ֆադեևը։
Ալեքսանդր Չուբարյանը ռուսաստանցի պատմաբան է, Ռուսաստանի գիտությունների ակադեմիայի ակադեմիկոս, պատմական գիտությունների դոկտոր։
Ծնվել է 1931 թվականի հոկտեմբերի 14-ին Մոսկվայում։ Նա միջազգային հարաբերությունների պատմության և 20-րդ դարի ռուս-եվրոպական հարաբերությունների մասնագետ է, ավելի քան 350 գիտական աշխատությունների հեղինակ, ռուսական պատմագրության մեջ եվրոպական գաղափարների ուսումնասիրման ուղղության հիմնադիրներից մեկն է։
1988-2015 թվականներին ղեկավարել է Ռուսաստանի գիտությունների ակադեմիայի ընդհանուր պատմության ինստիտուտը, ներկայումս դրա գիտական ղեկավարն է: Ակադեմիական հրատարակությունների գլխավոր խմբագիրն է, Հումանիտար գիտությունների պետական ակադեմիական համալսարանի նախագահ, Ռուսաստանի պատմական միության համանախագահ: «Հայրենիքին մատուցած ծառայությունների համար» շքանշանի լիիրավ ասպետ, ՌԴ պետական մրցանակի դափնեկիր: