ԵՐԵՎԱՆ, 9 հունիսի - Sputnik. Ռուսաստանի զինված ուժերը անցած գիշեր մեծ հեռահարության բարձր ճշգրտության զենքով զանգվածային հարված են հասցրել Ռովնոյի մարզի Դուբնոյի շրջանում Ուկրաինայի զինված ուժերի մարտավարական օդուժի բազավորման օդանավակայաններից մեկին: Այս մասին հայտնել Է Ռուսաստանի պաշտպանական գերատեսչությունը։
«Այսօր գիշերը Ռուսաստանի Դաշնության Զինված ուժերը մեծ հեռահարության բարձր ճշգրտության զենքով զանգվածային հարված են հասցրել Ռովնոյի մարզի Դուբնո բնակավայրի շրջանում Ուկրաինայի զինված ուժերի մարտավարական օդուժի բազավորման օդանավակայաններից մեկին։ Սա Կիևի ռեժիմի կողմից ռուսաստանյան ռազմական օդանավակայանների ուղղությամբ իրականացված ահաբեկչական հարձակումներին պատասխան հարվածներից մեկն է», - ասվում է հաղորդագրության մեջ։
Այսօր ավելի վաղ Չուվաշիայի ղեկավար Օլեգ Նիկոլաևը հայտնել էր, որ առավոտյան հանրապետության տարածքում արձանագրվել են Ուկրաինայի կողմից անօդաչու թռչող սարքերի կիրառման փորձեր: Երկու ԱԹՍ ընկել է «Համառուսաստանյան ռելեաշինության գիտահետազոտական ինստիտուտ» («Всероссийский научно-исследовательский институт релестроения», (ВНИИР)) ընկերության տարածքում, ինչի պատճառով և աշխատակիցների անվտանգությունն ապահովելու համար որոշում է կայացվել արտադրությունը ժամանակավորապես դադարեցնելու մասին: Զոհեր և տուժածներ չկան: