ԵՐԵՎԱՆ, 9 հունիսի - Sputnik. Գազայի հատվածին աջակցող ցամաքային ավտոշարասյունը Թունիսից մեկնել է պաղեստինյան կիսաէքսկլավ՝ նպատակ ունենալով հասնելԻսրայելի կողմից Գազայի շրջափակման վերացմանը, հաղորդում է ՌԻԱ Նովոստիի թղթակիցը:
Այսօր թունիսյան մի շարք կազմակերպությունների կողմից կազմակերպված «տոկունության ավտոշարասյունը» ավտոբուսներով և ավտոմեքենաներով դուրս է եկել Թունիսի մայրաքաղաքից: Դրա կազմում ընդգրկված են մոտ երկու հազար տեղական ակտիվիստներ՝ քաղաքական գործիչներ, իրավապաշտպաններ, բժիշկներ և լրագրողներ։ Ակնկալվում է, որ Ռաֆահ տանող ճանապարհին շարասյանը կմիանան ակտիվիստներ Մավրիտանիայից, Մարոկկոյից, Ալժիրից, Լիբիայից և Եգիպտոսից:
«Կանգառներ են նախատեսված Սֆաքս, Գաբես և Մեդենին Նահանգներում (Թունիսում- խմբ.)՝ մյուս մասնակիցներին վերցնելու համար։ Այնուհետև մենք կանցնենք Լիբիան՝ Տրիպոլիով, Միսուրատայով, Սիրտով, Բենգազիով և Տոբրուկով, կանցնենք եգիպտական Էս Սալլում սահմանային անցակետով, կհասնենք Կահիրե, ապա՝ «Ռաֆահ» անցակետ»,-ՌԻԱ Նովոստիին պատմել է ավտոշարասյան ներկայացուցիչ, թունիսցի բժիշկ Մուհամեդ Ամին Բենուրը:
Նա ընդգծել է, որ ցամաքային ավտոշարասյունը Իսրայելի կողմից Գազայի հատվածի շրջափակումը վերացնելու նպատակով ճնշում գործադրելու միջազգային շարժման մի մասն է:
2025 թվականի մարտի 18-ի գիշերը Իսրայելի պաշտպանության բանակը վերսկսել է հարվածները Գազայի հատվածին։ Իսրայելի վարչապետ Բենյամին Նեթանյահուն հայտարարել է, որ հարձակումները շարունակվել են ՀԱՄԱՍ-ի կողմից հրադադարի ռեժիմի երկարաձգման և պատանդների ազատ արձակման ամերիկյան ծրագիրն ընդունելուց հրաժարվելու պատճառով: Իսրայելի և ՀԱՄԱՍ-ի միջև պաշտոնապես հրադադարն ավարտվել էր մարտի 1-ին, սակայն ռազմական գործողությունները չէին վերսկսվում Գազայի հատվածում կարգավորման շուրջ բանակցությունների շարունակմանը կողմերին ներգրավելու միջնորդների փորձերի պատճառով: Այնուամենայնիվ, Իսրայելը դադարեցրել է էլեկտրաէներգիայի մատակարարումը Գազայի աղազերծման կայանին և փակել է մարդասիրական օգնություն տեղափոխող բեռնատարների մուտքն դրա տարածք: