ՀՀԿ-ի գործադիր մարմինն անցած շաբա առաջարկել էր ԱԺ «Պատիվ ունեմ» խմբակցության պատգամավորներին, «Ազգային ժողովի կանոնակարգ» սահմանադրական օրենքի համաձայն, վարչապետին անվստահություն հայտնելու մասին առաջարկ ներկայացնելու՝ այդ նպատակով առաջարկելով Հանրապետականի Խորհրդի փորձառու և բարձր որակավորում ունեցող անդամներից առաջադրել պահանջվող հատկանիշներին համապատասխանող վարչապետի թեկնածու և նախապատրաստել Ազգային ժողովի որոշման նախագիծ՝ գործող վարչախմբի պարագլխին անվստահություն հայտնելու գործընթացը մեկնարկելու համար:
Գործընթացը հաջողությամբ ավարտելուց հետո ազգային համաձայնության սկզբունքով կազմավորել կառավարություն: ՀՀԿ-ի առաջարկից մեկ օր անց Ազգային ժողովի «Պատիվ ունեմ» խմբակցությունը վարչապետի թեկնածուի պաշտոնում առաջադրեց Հանրապետականի Խորհրդի անդամ, Մասիսի համայնքապետ Դավիթ Համբարձումյանի թեկնածությունը։
Իմպիչմենտի նախաձեռնությունը Հայաստանի երկրորդ նախագահ, «Հայաստան» դաշինքի ղեկավար Ռոբերտ Քոչարյանը անիրատեսական է որակել։ՀՀԿ-ն էլ մեղադրում է «Հայաստան» դաշինքին՝ այդ գործընթացին չմիանալու համար։ Ի դեպ, Դավիթ Համբարձումյանը այս գործընթացում վարչապետի միակ թեկնածուն չէ։
«Քաղպայմանագիր» խմբացությունից հեռացված Հովիկ Աղազարյանն ու Հակոբ Ասլանյանը, ովքեր վարչապետի թեկնածու են առաջադրել «Լուսավոր Հայաստան» կուսակցության նախագահ Էդմոն Մարուքյանին, չեն պատրաստվում աջակցել «Պատիվ ունեմ» խմբակցության առաջադրած թեկնածուին՝ Մասիսի համայնքապետ Դավիթ Համբարձումյանին:
«Իմպիչմենտի գործընթացում վարչապետի թեկնածուի անձը էական չէ, էական է համապատասխան քվեների քանակը»,- Sputnik Արմենիայի հետ զրույցում կարծիք է հայտնել քաղտեխնոլոգ Արմեն Բադալյանը։