Հայաստանում կոնյակ արտադրող և արտահանող ընկերությունները շարունակում են իրենց բողոքի ձայնը բարձրացնել Վրաստանի հետ սահմանին կոնյակի արտահանման խոչընդոտների հետ կապված։
Տնտեսվարողները երկու անգամ բողոքի ցույց են իրականացրել Հայաստանում Վրաստանի դեսպանատան առջև` բացատրություն պահանջելով վրացական կողմից, թե ինչու է սահմանին խոչընդոտվում հայկական կոնյակի արտահանումը և դրա պատճառով բեռնատարները ստիպված են լինում ամիսներ շարունակ մնալ սահմանային անցակետում։
Թեև Վրաստանի ֆինանսների նախարարությունը հայտարարել էր, թե դա ընդամենը մաքսային ընթացակարգ է, իսկ Հայաստանի էկոնոմիկայի նախարարն էլ խոստացել էր հանդիպել վրացի գործընկերների հետ, այդուհանդերձ խնդիրը մինչ օրս կարգավորված չէ։ Էկոնոմիկայի նախարար Գևորգ Պապոյանն էլ ակնարկել էր, թե այնպես չէ, որ իր` Վրաստան գնալով հարցը լուծվելու է։
«Չնայած բոլոր հավաստիացումներին, խնդիրը մնում է չլուծված։ 45 օրից ավելի է` ինչ կոնյակով բեռնված մոտ 40 ավտոմեքենաներ մնացել են հայ-վրացական սահմանին»,-Sputnik Արմենիայի հետ զրույցում փաստել է «Պռոշյանի կոնյակի գործարանի» գլխավոր տեխնոլոգ Ալբերտ Ներսիսյանը։