Հանրային ծառայությունները կարգավորող հանձնաժողովը որոշում է կայացրել երկարաձգել «Հայաստանի էլեկտրական ցանցեր» ընկերության լիցենզիան մինչև 2029 թվականի փետրվարի 1-ը։ Որոշման մեջ հիշեցվում է, որ Հայաստանը փուլ առ փուլ անցում է կատարում ազատ էլեկտրաէներգետիկ շուկայի մոդելի, որի համաձայն՝ էլեկտրացանցը մնում է միասնական և կառավարվում է մեկ օպերատորի կողմից, իսկ մատակարարները կարող են լինել մի քանիսը՝ վճարելով ցանցից օգտվելու համար։
Տնտեսվարողները պարտավոր կլինեն գնել էլեկտրաէներգիան շուկայական գներով, իսկ բնակչության համար, ցանկության դեպքում, կպահպանվեն ֆիքսված սակագներ՝ ապահովված երաշխավորված մատակարարի կողմից։ Ներկայում այդ դերը կատարում է «Հայաստանի էլեկտրական ցանցերը», սակայն մինչև 2029 թվականի փետրվարի 1-ը պետք է ընդունվի «Էլեկտրաէներգետիկայի մասին» նոր օրենք, ըստ որի՝ երաշխավորված մատակարարը ընտրվելու է մրցութային հիմունքներով։ Ըստ այդմ` ՀԷՑ-ը նույնպես կարող է մասնակցել այդ մրցույթին։
«Եթե ոչ դե յուրե, ապա` դե ֆակտո Հայաստանի էլեկտրական ցանցերը» շարունակում է մնալ ՀՀ-ի էլեկտրաէներգետիկ համակարգի առանցքը և կարևորագույն խաղացողը։ Իսկ էներգետիկ համակարգի ազատականացումը խիստ վաղաժամ որոշում էր»,-Sputnik Արմենիայի հետ զրույցում նշել է քաղաքական գիտությունների և տնտեսագիտության դոկտոր, էներգետիկ անվտանգության հարցերով փորձագետ Վահե Դավթյանը։