«Ապագայի համար հաջող ներդրում». Ֆիոլետովոյում մանկապարտեզի հիմնարկեքի արարողություն է եղել

ԵՐԵՎԱՆ, 2 հունիսի - Sputnik. Լոռու մարզի Ֆիոլետովո գյուղում մեկնարկել է 400 քմ մակերեսով մանկապարտեզի կառուցման նախագիծը։ Այս մասին հայտնում է Հայաստանում Ռուսական տան մամուլի ծառայությունը:

50 երեխայի համար նախատեսված մանկապարտեզը հետագայում կունենա սպորտի և խաղերի դահլիճներ, բուժկետ:

«Ֆիոլետովոն հարուստ պատմությամբ և ամուր ավանդույթներով եզակի վայր է։ Այստեղ մոլոկաններն են ապրում, որոնք պահպանել են իրենց հավատը, մշակույթը և բարիդրացիական ոգին», - իր ուղերձում ասաց «Ռոսսոտրուդնիչեստվոյի» ղեկավար Եվգենի Պրիմակովը։

ՀՀ–ում ՌԴ դեսպան Սերգեյ Կոպիրկինի խոսքով՝ մանկապարտեզը շատ լավ, հաջող ներդրման օրինակ կդառնա մեր ընդհանուր ապագայի, ինչպես նաև մոլոկան համայնքի և հայ-ռուսական հարաբերությունների ապագայի համար։

Լոռու փոխմարզպետ Հովհաննես Ավետիսյանը կարևորեց կրթական հաստատությունների կառուցման և բացման, ինչպես նաև Հայաստանում բնակվող այլ ազգերի ներկայացուցիչների կենսապայմանների բարելավման առաջնահերթ նշանակությունը:

Հիմնարկեքի արարողությանը «Ռոսսոտրուդնիչեստվոյի» ղեկավարից ու Հայաստանում Ռուսաստանի դեսպանից բացի ներկա են եղել նաև ՀԿԵ-ի, «Ռոսատոմի», «Ռուսական մարդասիրական առաքելության», Լոռու մարզպետարանի ներկայացուցիչներ: