ԵՐԵՎԱՆ, 27 մայիսի – Sputnik․ Երևանյան խցանումների հարցը լուծելու համար կարելի է նախարարությունները տեղաբաշխել տարբեր մարզերում՝ այդպիսով բեռնաթափելով մայրաքաղաքը և աշխուժացնելով մարզերի կյանքը։ Այսօր ԱԺ-ում հայտարարությունների ժամին նման առաջարկ ներկայացրեց «Քաղաքացիական պայմանագիր» խմբակցության անդամ Սերգեյ Բագրատյանը։
«Մինչև տարեվերջ կարելի է հատկապես երևանամերձ մարզերում տեղաբաշխել նախարարությունները»,- ասաց Բագրատյանը։
Նրա խոսքով՝ տարածքային կառավարման և ենթակառուցվածքների նախարարությունն, օրինակ, կարելի է Կոտայքում տեղակայել, Ֆինանսների նախարարությունը՝ Արագածոտնի մարզում։
«Պաշտպանության նախարարության ամենակարևոր գործառույթը Սյունիքում է, ճիշտ կլինի, որ այս նախարարությունն ամբողջ կառուցվածքով տեղափոխվի Սյունիք։ Շրջակա միջավայրի նախարարությունը պետք է լինի Գեղարքունիքում, որովհետև Սևանա լիճն է թիվ մեկ խնդիրը»,- կարծում է նա։
Կրթության, գիտության, մշակույթի և սպորտի նախարարությունը, ըստ պատգամավորի, ճիշտ կլինի տեղակայել Շիրակի մարզում, էկոնոմիկայի նախարարությունը՝ Արմավիրի մարզում, աշխատանքի և սոցիալական հարցերի նախարարությունը` Տավուշի, առողջապահության նախարարությունն էլ` Լոռու մարզում։
Ընդ որում՝ պատգամավորի առաջարկն է նախարարությունները ոչ թե մարզկենտրոններում, այլ տվյալ մարզի 2–րդ քաղաքում տեղակայել։
Բագրատյանի կարծիքով՝ մայրաքաղաքը բեռնաթափելու համար անհրաժեշտ է նաև բարձրագույն ուսումնական բոլոր հաստատությունները տեղափոխել Ակադեմիական քաղաք, անպայմանորեն Երևանից հանել նաև խոշոր առևտրի կենտրոնները։
Վստահ է, որ սա կօգնի նաև մարզերից նվազեցնել արտագաղթը, կաշխուժացնի կյանքը նաև սահմանամերձ գյուղերում, կնպաստի տարածքային համաչափ զարգացմանը։